शालेय विद्यार्थ्यांसाठी पर्यावरणपूरक कार्यशाळा
महापालिकेची ‘हरित बाप्पा फलित बाप्पा’ संकल्पना
कल्याण, ता. ९ (वार्ताहर) : पर्यावरणपूरक श्री गणेशोत्सवाच्या अधिकाधिक जनजागृतीसाठी आणि आगामी गणेशोत्सवात शाडू मातीच्या मूर्तींची प्रतिष्ठापना व्हावी, यासाठी कल्याण-डोंबिवली महापालिकेने ‘हरित बाप्पा फलित बाप्पा’ या संकल्पनेतून कार्यशाळेचे आयोजन केले आहे. महापालिका आणि एज्युकेशन टुडे फाउंडेशन यांच्या संयुक्त विद्यमाने मंगळवारी (ता. १२) डोंबिवली पूर्व येथील वै.ह.भ.प. संत सावळाराम महाराज क्रीडा संकुलाच्या कै. सुरेंद्र वाजपेयी सभागृहात ही कार्यशाळा आयोजित केली आहे.

कार्यशाळा दोन सत्रांत होणार असून, महापालिका क्षेत्रातील सुमारे चार हजार शालेय विद्यार्थी या कार्यशाळेत सहभागी होणार आहेत. विद्यार्थ्यांना शाडू माती आणि नैसर्गिक रंगांचा पर्यावरणपूरक वापर करून पारंपरिक कला-सांस्कृतिक मूल्ये तसेच निसर्ग संवर्धनाची जाणीव कशी वाढवता येईल, याचा अनुभव देण्यात येणार आहे, असे कार्यशाळेच्या प्रकल्प प्रमुख तथा कार्यकारी अभियंता रोहिणी लोकरे यांनी आयुक्तांच्या दालनात झालेल्या पत्रकार परिषदेत सांगितले.

पर्यावरणपूरक गणेशोत्सवाचा संदेश समाजात पोहोचवण्यासाठी विद्यार्थी स्वतः शाडू मातीची श्री गणेशाची मूर्ती तयार करतील. त्यासाठी लागणारी शाडू माती महापालिकेकडून पुरवली जाणार आहे. तसेच श्री गणेश मंडळांनी शक्य असल्यास सहा फुटांपेक्षा कमी उंचीच्या पर्यावरणपूरक गणेशमूर्तींची प्रतिष्ठापना करावी, विसर्जन कृत्रिम तलावात करावे आणि पर्यावरणपूरक गणेशोत्सव साजरा करावा, असे आवाहन महापालिका आयुक्त अभिनव गोयल यांनी केले.

शासनाच्या ‘घरोघरी तिरंगा’ अभियानांतर्गत शालेय विद्यार्थ्यांमार्फत विविध उपक्रम राबविण्यात येत आहेत. रांगोळी काढणे, राखी तयार करणे, जवानांना पत्र लिहिणे इत्यादी उपक्रम राबवले जात आहेत. या अभियानात येत्या रविवारी (ता. १०) सकाळी साडेसहा वाजता सायकल रॅलीचे आयोजन करण्यात आले असून, नागरिकांनी अधिकाधिक सहभाग घेऊन पुढाकार घ्यावा, असे आवाहन आयुक्त अभिनव गोयल यांनी केले आहे.