अंबरनाथ, ता. ९ (वार्ताहर) : अंबरनाथ पश्चिम येथील न्यू भेंडीपाडा परिसरात एका बंद घराचे कुलूप तोडून चोरट्यांनी ९७ हजार रुपयांचे सोन्याचे दागिने आणि रोख रक्कम लंपास केली आहे. याप्रकरणी अंबरनाथ पश्चिम पोलिस ठाण्यात चोरट्यांविरोधात गुन्हा दाखल करण्यात आला आहे.
विद्या खंदारे (वय ३२) या त्यांच्या कुटुंबीयांसह २९ जुलैला गावी गेल्या होत्या. याच संधीचा फायदा घेत चोरट्यांनी घराचे कुलूप तोडून आत प्रवेश केला. घरात ठेवलेल्या दोन लोखंडी कपाटांचे लॉक तोडून त्यातील सोन्याचे दागिने आणि रोख रक्कम चोरून नेली. खंदारे कुटुंब ७ ऑगस्टला परत आल्यावर त्यांना हा प्रकार लक्षात आला. त्यांनी तत्काळ पोलिसांना माहिती दिली. घरफोडीत एकूण ९७ हजार रुपयांचे दागिने आणि रोख रक्कम चोरीला गेल्याचे फिर्यादीने म्हटले आहे. या घटनेचा पुढील तपास सहाय्यक पोलिस निरीक्षक सुभाष पानसरे करत आहेत.