मुरबाड, ता. ९ (बातमीदार) : काळू नदीवरील प्रस्तावित धरणाच्या बाधित क्षेत्रातील ग्रामपंचायतींच्या विशेष ग्रामसभांना स्थगिती देण्यात आली आहे. मुरबाडचे आमदार किसन कथोरे यांनी ग्रामस्थांच्या तीव्र विरोधाची दखल घेऊन बुडीत क्षेत्रातील गावांमध्ये नियोजित ग्रामसभा अनिश्चित काळासाठी स्थगित करण्याचे निर्देश प्रशासनाला दिले. तसेच मतदारसंघातील शेतकरी व स्थानिक रहिवाशांना विश्वासात घेतल्याशिवाय कोणतीही कार्यवाही न करण्याच्या सूचना संबंधित विभागांना दिल्याची माहिती माजी पंचायत समिती सदस्य अनिलभाऊ घरत यांनी दिली.

पुनर्वसन व भूसंपादन विषयावर बाधित गावांमध्ये ग्रामपंचायतींमार्फत विशेष ग्रामसभा घेण्यात आल्या होत्या. मात्र, तळेगाव येथे बुधवारी पार पडलेल्या बैठकीत प्रशासनाने स्थानिकांना विश्वासात न घेता सुरू केलेल्या या कार्यवाहीवर ग्रामस्थांनी नाराजी व्यक्त करत संघर्षाचा इशारा दिला होता. या संदर्भातील वृत्त सकाळमध्ये शुक्रवारी प्रसिद्धही करण्यात आले. दरम्यान, परिसरातील नागरिकांनी काळू धरणविरोधी जनजागृती मंचाचे मार्गदर्शक पोपटराव देशमुख यांच्या नेतृत्वाखाली आमदार किसन कथोरे यांची भेट घेऊन आभार मानले. पुढील काळात आमदार स्वतः बाधित गावांचा दौरा करून नागरिकांशी चर्चा करतील आणि समस्या जाणून घेतील, असे विलासकाका देशमुख यांनी सांगितले.
२०१३ मध्येही परिसरातील नागरिकांनी एकजूट दाखवत सुरू झालेली सरकारी मोजणी थांबवण्यास भाग पाडले होते. त्यामुळे यंदाही धरणग्रस्तांचा लढा तीव्र होण्याची शक्यता आहे.