बारवी रस्त्याची दुरुस्ती संथ गतीने
अरुंद रस्त्यामुळे अपघाताचा धोका; पथदिव्यांचा अभाव
बदलापूर, ता. ११ (बातमीदार) : बदलापूरहून बारवी धरणाकडे जाणाऱ्या रस्त्याचे दुरुस्तीचे काम अत्यंत संथ गतीने सुरू आहे. त्यामुळे वाहनचालक आणि नागरिकांमध्ये नाराजी व्यक्त केली जात आहे. आधीच अरुंद रस्ता, त्यात पथदिवे नसल्याने अपघाताचा धोका वाढला असून, हे काम पूर्ण कधी होणार, असा प्रश्न नागरिक उपस्थित करत आहेत.

बारवी धरण परिसरात काही दिवसांपूर्वी झालेल्या अपघातानंतर या रस्त्याची दुरवस्था चर्चेचा विषय ठरली आहे. बदलापूरहून बारवीपर्यंतचा सुमारे १० किमीचा रस्ता गेल्या चार ते पाच महिन्यांपासून सीमेंट काँक्रीटच्या कामासाठी खोदलेला असून, या कालावधीत केवळ २५ टक्केच काम पूर्ण झाले आहे. या रस्त्याच्या दोन्ही बाजूंना शेतजमिनी आणि जंगलाचा परिसर असल्यामुळे रात्रीच्या वेळी अंधारात वाहन चालवताना मोठा धोका निर्माण होतो. पथदिव्यांचा अभाव आणि चालू असलेले अपूर्ण रस्त्याचे काम यामुळे रात्री वाहतुकीदरम्यान अपघाताची शक्यता वाढते आहे. वाहनचालकांना अत्यंत सावधगिरीने मार्गक्रमण करावे लागत आहे.

जबाबदारीबाबत चालढकल
रस्ता एमआयडीसी प्रशासनाच्या अखत्यारीत येतो, मात्र विचारणा केल्यावर एमआयडीसीने सांगितले की रस्ता सार्वजनिक बांधकाम विभागाकडे वर्ग केला आहे, तर पीडब्ल्यूडीने हा प्रकल्प महाराष्ट्र राज्य पायाभूत सुविधा विकास महामंडळाकडे वर्ग केल्याचे स्पष्ट केले. या कामाविषयी संबंधित अभियंता दिलीप हिंगे यांनी सांगितले की, “रस्ता अरुंद आहे, शिवाय पावसाळा सुरू झाल्यामुळे काम रखडले आहे. मे महिन्याच्या सुरुवातीपासूनच पावसाने हजेरी लावल्यामुळे नियोजित वेळेत काम पूर्ण करता आले नाही, मात्र पावसाचा उगम नसलेल्या दिवसांमध्ये काम सुरू आहे. पावसाळा संपल्यानंतर रस्त्याचे काम गतीने पूर्ण केले जाईल.”

वाहनचालक त्रस्त
दरम्यान, वाहनचालक आणि स्थानिक नागरिकांनी प्रशासनाकडे मागणी केली आहे की, या महत्त्वाच्या रस्त्याचे काम युद्धपातळीवर पूर्ण करावे, तसेच पथदिव्यांची तातडीने व्यवस्था करावी, जेणेकरून अपघात टाळता येतील.