देशाचे भवितव्य सनदी लेखापालांच्या हाती
महापालिका आयुक्त अभिनव गोयल यांचे गौरवोद्गार
डोंबिवली, ता. ११ : देशाच्या अर्थव्यवस्थेच्या प्रगतीत चार्टर्ड अकाउंटंट्स (सीए) यांची भूमिका महत्त्वाची असून भविष्यातील आर्थिक वाटचाल त्यांच्या खांद्यावर आहे," असे गौरवोद्गार कल्याण-डोंबिवली महानगरपालिकेचे आयुक्त अभिनव गोयल यांनी व्यक्त केले. इन्स्टिट्यूट ऑफ चार्टर्ड अकाउंटंट्स ऑफ इंडिया, कल्याण-डोंबिवली शाखा आयोजित ‘डायरेक्ट टॅक्स’ विषयावरील दोन दिवसीय परिषदेत ते बोलत होते. या परिषदेचे उद्घाटन गोयल यांच्या प्रमुख उपस्थितीत करण्यात आले.

आज भारत जागतिक अर्थव्यवस्थेत एका महत्त्वाच्या टप्प्यावर उभा आहे. देशात चालू असलेल्या विविध विकास प्रकल्पांमध्ये उद्योजक, व्यापारी आणि त्यांच्यासोबतच कर संकलनाच्या प्रक्रियेत सीए वर्ग महत्त्वपूर्ण भूमिका बजावत आहे," असे आयुक्त गोयल यांनी सांगितले. देशाचे कर संकलन जितके प्रभावी, तितकीच आर्थिक प्रगती, या विचारांवर त्यांनी भर दिला आणि अशा प्रकारच्या करविषयक परिषदा हे जनजागृतीचं प्रभावी माध्यम असल्याचे मत मांडले.
यावेळी गोयल यांनी कल्याणमधील आयसीए भवनाच्या प्रलंबित प्रकल्पाबाबत सकारात्मक भूमिका घेतली. "महापालिका प्रशासनाकडून लवकरच आयसीए भवनाचा प्रश्न मार्गी लावण्यात येईल," अशी ग्वाही त्यांनी दिली. “निकट भविष्यात हे स्वप्न साकार झालेलं पाहायला मिळेल, असे त्यांनी स्पष्ट केले.

देशात उद्योगस्नेही धोरणांची वाटचाल
डायरेक्ट टॅक्स कमिटीचे अध्यक्ष पियूष छाजेड आणि उपाध्यक्ष विष्णू अग्रवाल यांनी सांगितले की, चांगल्या टॅक्स पॉलिसींमुळे भारतात उद्योगस्नेही वातावरण तयार होत असून, देश उद्योगधंद्याच्या अनुकूल धोरणांमध्ये सातत्याने प्रगती करत आहे. कल्याण-डोंबिवली शाखेचे अध्यक्ष सीए राकेश अग्रवाल यांनी आयसीए भवन ही त्यांच्या सर्व सदस्यांची दीर्घकाळची अपेक्षा असल्याचे सांगून, ते साकार झाल्यास हजारो सीएंसाठी एक सशक्त शैक्षणिक व्यासपीठ उपलब्ध होईल, असे नमूद केले.

दोन दिवसीय परिषद यशस्वी
७ आणि ८ ऑगस्ट रोजी झालेल्या या परिषदेत देशभरातील कर तज्ज्ञांनी डायरेक्ट टॅक्स विषयावर मार्गदर्शन केले. परिषद यशस्वी करण्यासाठी शाखाध्यक्ष सीए राकेश अग्रवाल, उपाध्यक्ष सीए अमित मोहरे, सचिव सीए प्रदीप मेहता, खजिनदार सीए विपुल शहा, तसेच समिती सदस्य आणि माजी अध्यक्ष यांच्यासह अनेक सदस्यांनी विशेष मेहनत घेतली. या परिषदेने सीए व्यावसायिकांना नवे ज्ञान, बदलते कर धोरण आणि आर्थिक यंत्रणेत त्यांची भूमिका यावर चिंतन करण्याची संधी दिली. देशाच्या आर्थिक विकासात सीएंचे योगदान अधिक सशक्त होईल, असा विश्वास उपस्थित मान्यवरांनी व्यक्त केला.