रक्षाबंधनदिनी एसटीला लाडक्या बहिणींकडून भेट
दोन दिवसांत तीन कोटी ४५ लाखांचे विक्रमी उत्पन्न
ठाणे, ता. ११ (बातमीदार) : रक्षाबंधन सणाच्या निमित्ताने लाडक्या बहिणींनी एसटीला आर्थिक लाभ देत त्याच्या आर्थिक विकासाला मोठा हातभार लावला आहे. ठाणे विभागाने केवळ दोन दिवसांत तीन कोटी ४५ लाखांचे विक्रमी उत्पन्न मिळवले असून, हे उत्पन्न मुंबई प्रदेशातील सर्वाधिक आहे. तथापि, गायमुख घाटाजवळील रस्त्याच्या कामामुळे झालेल्या वाहतूक कोंडीचा फटका एसटीला बसला आहे. घोडबंदर व भिवंडी मार्गावरील मोठ्या कोंडीमुळे एसटीला या दोन दिवसांत अंदाजे १५ लाखांचा आर्थिक फटका सहन करावा लागला.

रक्षाबंधनाच्या दिवशी भावाला राखी बांधण्यासाठी बाहेर जाणाऱ्या बहिणींनी एसटीचा मोठा वापर केला. ८ आणि ९ ऑगस्टच्या दोन दिवसांत महिलांनी त्यांच्या कुटुंबांसह एसटीने प्रवास करीत जादा वाहतुकीतून तीन कोटी ४५ लाख इतके उत्पन्न मिळवून दिले. ठाणे विभागाने या सणासाठी अतिरिक्त बस गाड्या उपलब्ध करून दिल्या होत्या, ज्याचा महिलांनी पुरेपूर वापर करून सुरक्षित प्रवास केला. हे उत्पन्न गतवर्षीच्या तुलनेत ३३ लाखांनी जास्त आहे. या वाढीव उत्पन्नामुळे एसटीला मोठा आर्थिक आधार मिळाला आहे.

वाहतूक कोंडीचा फटका
रक्षाबंधनाच्या दिवशी घोडबंदर रोड आणि भिवंडी मार्गावर प्रचंड वाहतूक कोंडी झाल्याने एसटीच्या बसेस वेळेत पोहोचू शकल्या नाहीत. यामुळे एसटीचे उत्पन्न १० ते १५ लाखांनी कमी झाले, असे अधिकाऱ्यांचे मत आहे.

ठाणे विभागातील महाराष्ट्र राज्य परिवहन महामंडळाने रक्षाबंधनासाठी पूर्वनियोजित जादा बस गाड्यांची सेवा सुरू ठेवली होती. या प्रवाशांच्या वाढत्या संख्येचा यशस्वीपणे सामना करण्यात आला. विभागीय नियंत्रक सागर पळसुले यांनी सर्व चालक, वाहक, वाहतूक नियंत्रक, यांत्रिकी कर्मचारी, प्रशासकीय कर्मचारी, पर्यवेक्षक, आगार व्यवस्थापक आणि इतर कर्मचाऱ्यांचे कौतुक केले आहे.
- सागर पळसुले, विभाग नियंत्रक, ठाणे विभाग

आकडेवारी

एकूण किमी : ५,४५,०००
एकूण उत्पन्न : तीन कोटी ४५ लाख
गतवर्षीपेक्षा उत्पन्नात वाढ : ३३ लाख
गतवर्षीपेक्षा जादा प्रवास : ४१,४८५