तळोजा पाणी पुरवठा समस्यासंदर्भात लवकरच बैठक
नगरविकास विभागातील सहसचिवांचे हाऊसिंग फेडरेशनला आश्वासन
खारघर, ता. ११ (बातमीदार) ः तळोजा वसाहतीतील दीर्घकाळापासून सुरू असलेल्या पाणीपुरवठा, अग्निशमन केंद्र आणि रुग्णालय सुविधांच्या समस्यांवर तोडगा काढण्यासाठी येत्या आठवड्यात बैठक आयोजित केली जाणार आहे. ही बैठक सिडकोचे व्यवस्थापकीय संचालक, नगरविकास विभाग व तळोजा हाऊसिंग फेडरेशनच्या शिष्टमंडळाच्या उपस्थितीत होणार असल्याचे आश्वासन नगरविकास सहसचिव सुबराव शिंदे यांनी दिले.
तळोजा वसाहतीतील अनेक भागात पाणी कमी दाबाने येते, त्यामुळे रहिवाशांना दररोज अडचणींना सामोरे जावे लागते. अनेक वर्षांपासून नागरिकांनी मोर्चे व आंदोलने करूनही हा प्रश्न सुटलेला नाही. त्यातच सिडकोकडून तळोजा फेज एक व दोनमध्ये नवनवीन गृहप्रकल्प उभारणीचे काम वेगाने सुरू आहे. या भागातील लोकसंख्या आधीच लाखाच्या घरात असून, ती झपाट्याने वाढत आहे. अशा परिस्थितीत पाणीपुरवठा समस्या भविष्यात अधिक गंभीर होण्याची भीती व्यक्त केली जात आहे. अग्निशमन केंद्राच्या अभावाची समस्यादेखील तीव्र आहे. आगीच्या घटनांमध्ये तळोजा येथील रहिवाशांना कळंबोली किंवा खारघर येथील अग्निशमन केंद्रावर अवलंबून राहावे लागते. घटनेच्या ठिकाणी यंत्रणा पोहोचेपर्यंत मोठ्या प्रमाणावर हानी झाल्याच्या अनेक घटना घडल्या आहेत. आरोग्य सेवेतही उणिवा स्पष्ट दिसतात. फेज दोनमध्ये पालिकेचे प्राथमिक आरोग्य केंद्र असले तरी, संपूर्ण सुविधांनी सज्ज असे रुग्णालय वसाहतीच्या मध्यभागी उपलब्ध नाही. या सर्व मागण्यांसाठी तळोजा हाऊसिंग फेडरेशनच्या वतीने ७ ऑगस्ट रोजी मुंबईतील आझाद मैदानावर आंदोलन करण्यात आले. या आंदोलनात जवळपास ३५० सोसायट्यांचे सदस्य सहभागी झाले होते, ज्यात महिलांचा सहभाग लक्षणीय होता. मंत्रालयात झालेल्या बैठकीत फेडरेशनचे अध्यक्ष प्रसाद पाटील यांनी सध्याचा पाणीपुरवठा सुधारण्याची, नवीन प्रकल्पांसाठी स्वतंत्र जलकुंभ उभारण्याची, तसेच फेज दोनमधील घरांना लागलेल्या गळती दुरुस्त करण्याची मागणी केली. यावर सहसचिव शिंदे यांनी सर्व समस्या निकाली काढण्यासाठी सिडको व फेडरेशनच्या संयुक्त बैठकीचे आश्वासन दिले.