मनोर, ता. १० (बातमीदार) : मुंबई-अहमदाबाद महामार्गालगतच्या सातिवली गावात अघोरी पूजा आणि जादूटोण्याचा प्रकार उघडकीस आल्यामुळे ग्रामस्थांमध्ये भीतीचे वातावरण निर्माण झाले आहे. या प्रकारामुळे गावातील वातावरण बिघडण्याची शक्यता व्यक्त केली जात आहे. ग्रामस्थ घटनास्थळी पोहोचण्याआधी अघोरी पूजा करणाऱ्या पुजाऱ्याने घटनास्थळावरून पळ काढला. याप्रकरणी मनोर पोलिस ठाण्यात सोमवारी (ता. १०) तीन जणांविरोधात गुन्हा दाखल करण्यात आला आहे.

महामार्गालगतच्या सातिवलीमध्ये शुक्रवारी (ता. ८) दुपारी पाटील पाड्याच्या स्मशानभूमी परिसरातील ओहळालगतच्या खडकावर अघोरी कृत्य आणि पूजा सुरू असल्याचे शेतकऱ्यांच्या निदर्शनास आले. याबाबतची माहिती शेतकऱ्यांनी ग्रामस्थांना दिल्यानंतर सरपंच, उपसरपंच, तंटामुक्ती अध्यक्ष, ग्रामपंचायत सदस्य, महिला आणि ग्रामस्थांनी घटनास्थळी धाव घेतली. पूजास्थळी ग्रामस्थ येत असल्याची कुणकुण लागताच अघोरी पूजा करणाऱ्या पुजाऱ्याने घटनास्थळावरून पळ काढला. ग्रामस्थांनी या पूजेबाबत जाब विचारला असता पूजेत सहभागी असलेल्यांनी सरपंच आणि ग्रामस्थांसोबत हुज्जत घालत पूजेबाबत कानावर हात ठेवले.

ग्रामपंचायत पदाधिकारी आणि ग्रामस्थांनी पूजा सुरू असलेल्या भागाची पाहणी केली. या वेळी पूजास्थळी पिठाचा वापर करून तयार केलेली बाहुली, लिंबू, चाकू, मिठाई, पांढरी टोपी, सफेद रुमाल, कोंबड्याची पिसे, आपट्याची पाने, अबीर, गुलाल आणि अगरबत्ती आदी साहित्य आढळून आले. आदिवासीबहुल या गावात बाहेरून आलेले व्यक्ती अघोरी पूजा घालून करणी आणि जादूटोणा करीत असल्यामुळे ग्रामस्थांमध्ये भीतीचे वातावरण निर्माण झाले आहे. सरपंच कृष्णा जाधव यांनी घटनेची माहिती दिल्यानंतर पाेलिसांनी महाराष्ट्र नरबळी, इतर अमानुष, अनिष्ठ व अघोरी प्रथा व जादूटोणा यांना प्रतिबंध करण्याबाबत आणि त्यांचे समूळ उच्चाटन करण्याबाबत अधिनियम २०१३ च्या कलम ३(२) आणि भारतीय न्याय संहितेच्या कलम ३(५) नुसार गुन्हा दाखल केला.

गावाबाहेरील लोकांनी सातिवली गावात येऊन स्मशानभूमी परिसरात अघोरी पूजा करण्याची घटना निंदनीय आहे. अघोरी पूजेच्या प्रकारामुळे गावात भीतीचे वातावरण आहे. पूजा करणाऱ्यांनी कोणत्या उद्देशाने पूजा केली, याची शहानिशा झाली पाहिजे.
- संदीप उराडे, अध्यक्ष, तंटामुक्ती समिती, सातिवली

पाटील पाडा स्मशानभूमी परिसरात घातलेल्या पूजेबाबत संबंधितांना विचारणा केली असता उडवाउडवीची उत्तरे दिली गेली. घटनेबाबत पोलिसांना माहिती दिल्यावर गुन्हा दाखल केला आहे. त्यांनी कठाेर कारवाई करावी.
- कृष्णा जाधव, सरपंच, सातिवली ग्रामपंचायत