कोपरा नाल्यात अडकलेला प्लास्टिक कचरा स्वच्छ करण्याची मागणी
खारघर, ता. ११ (बातमीदार) : कोपरा येथील नाल्यात मोठ्या प्रमाणात प्लास्टिक कचरा साचला आहे. मुसळधार पावसामध्ये कचऱ्यामुळे पुराचे पाणी सायन-पनवेल महामार्गवर येवून रस्ता जलमय होवू शकतो. पालिकेने वेळीच नाल्यातील कचरा दूर करावा, अशी मागणी नागरिकांकडून केली जात आहे.
कोपरा गावाकडून खारघर वसाहतीत जाणाऱ्या रस्त्यावरील नाल्यावर उभारण्यात आलेला पूल नाला अरुंद असून उंचीने कमी आहे. पावसाळ्यात खारघर डोंगरावरून येणाऱ्या पावसाच्या पाण्यामुळे पुलाखाली प्लास्टिक, कचरा आणि पालापाचोळा अडकून पडले आहे. या कचऱ्यामुळे पाणी निचरा होण्यास अडचण निर्माण होत असून पुराचे पाणी अनेक वेळा सायन-पनवेल महामार्गावर येऊन रस्त्याला नदीचे स्वरूप प्राप्त होते. त्यामुळे अनेक वाहने बंद पडत असून रस्त्यावर वाहतूक कोंडी होती. या पार्श्वभूमीवर पालिकेच्या खारघर प्रभाग कार्यालयाने वेळीच पुलाखाली नाल्यात अडकलेला कचरा हटवावे, अशी मागणी खारघर वासियांकडून केली जात आहे. या संदर्भात प्रभाग अधिकारी जितेंद्र मढवी यांच्याशी संपर्क साधला असता नाल्यातील कचरा नियमितपणे काढला जाईल, असे सांगितले.