गोखले पुलाखालील माहितीफलक निष्क्रिय
वर्दळीच्या भागात जनजागृती संदेश थांबले
जोगेश्‍वरी, ता. १२ (बातमीदार) ः अंधेरी पश्चिमेतील गोखले पुलाखालील राम झारूखा बिल्डिंगशेजारील माहिती फलक (डॅशबोर्ड) गेली कित्येक वर्षे बंद असून, सध्या तो धूळखात, झाडाच्या फांद्यांच्या वेढ्यात अडकून पडला आहे. एकेकाळी या फलकावर परिसरातील महत्त्वाची माहिती, जनजागृती संदेश तसेच मद्यप्राशन करून वाहन चालवू नये, वेगमर्यादा पाळा, अशा वाहतूक नियमांच्या सूचना दिवस-रात्र प्रसारित होत असत.
दीर्घकाळापासून देखभाल न झाल्याने हा डॅशबोर्ड पूर्णपणे निष्क्रिय झाला आहे. विशेष म्हणजे, हाकेच्या अंतरावरच अंधेरी वाहतूक पोलिसांचे कार्यालय असतानाही या बाबीकडे सातत्याने दुर्लक्ष होत असल्याने नागरिकांमध्ये आश्चर्य व्यक्त केले जात आहे. हा परिसर दिवस-रात्र गजबजलेला असून, वाहनांची मोठी रहदारी आणि पादचारींची सततची ये-जा येथे होते. अशा परिस्थितीत, जनजागृती व सुरक्षा संदेश देणाऱ्या सूचना फलकांची येथे अत्यंत गरज आहे. हे फलक पुन्हा कार्यान्वित झाल्यास अपघात रोखणे, वाहतूक शिस्त राखणे आणि नागरिकांची सुरक्षा वाढवणे शक्य होईल, असे स्थानिक नागरिकांनी सांगितले. वाहतूक विभागाने या डॅशबोर्डची तातडीने दुरुस्ती करून तो पुन्हा पूर्ववत करावा, अशी मागणी होत आहे.