खारघरवासी धुळीने बेजार
रस्त्यांवरील खड्ड्यांमुळे वाहनचालक त्रस्त
खारघर, ता. १२ (बातमीदार) : वसाहतीमधील रस्त्यांची दुरवस्था झाली आहे. रस्त्यावर पडलेले खड्डे, पसरलेली खडी तसेच उडणाऱ्या धुळीमुळे वाहनचालक त्रस्त आहेत. त्यामुळे किमान गणेशोत्सवापूर्वी तरी पालिकेने खड्डे दुरुस्ती करावी, अशी मागणी होत आहे.
एप्रिल, मेमध्येचे पालिकेने खारघरमधील बहुतांश रस्त्यांचे डांबरीकरण केले होते. अनेक वर्षांनंतर रस्त्यांच्या दुरुस्तीने पालिकेविषयी नागरिकांमध्ये सहानुभूती होती, मात्र गुळगुळीत रस्ते पावसात वाहून गेल्याने पुन्हा रस्त्यांची पार दुरवस्था झाली आहे. मोठ्या प्रमाणात पडलेले खड्डे, रस्त्यावर पसरलेली खडी आणि उडणाऱ्या धुळीमुळे नागरिक त्रस्त आहेत. या खड्ड्यांमुळे वाहनचालक अक्षरश: वैतागले असून, पंधरा दिवसांवर गणेशोत्सव आला असताना पालिकेकडून मात्र दुर्लक्ष केले जात असल्याने नागरिकांमध्ये नाराजी आहे.
---------------------------------
‘या’ मार्गांवर मनस्ताप
भारती विद्यापीठ उत्सव चौक मार्ग तळोजाकडे जाणाऱ्या रस्त्यावर बेलपाडा सर्कल, प्रणाम हॉटेल, तवा सर्कल, सेंट्रल पार्क गुरुद्वारा, सेक्टर-३५ मेट्रोपूल, पांडव मार्ग, ओवे पोलिस चौकीकडून प्रशांत कॉर्नरकडे जाणारा रस्ता, चेरोबा मंदिर रस्ता, बालभारती पब्लिक स्कूलकडून बेलपाडा, रॉयन इंटरनॅशनल स्कूलकडून खारघरगावाकडे जाणाऱ्या रस्त्यांचा समावेश आहे.
------------------------------
मतदारांमध्ये नाराजीचा सूर
खारघरमधून भाजपचे १२ लोकप्रतिनिधी पालिकेत होते. कोणतेही उल्लेखनीय काम त्यांनी केले नसल्याने मतदारांमध्ये नाराजी आहे. त्यात पालिकेने निकृष्ट दर्जाचे काम केल्यामुळे रस्त्यावर पसरलेली खडी आणि धुळीमुळे नागरिकांमध्ये नाराजी आहे. काही महिन्यांत पालिका निवडणूक होणार आहे. त्यामुळे खारघरमधील समस्यांकडील दुर्लक्षामुळे त्याचा राग मतपेटीतून व्यक्त होण्याची भीती आहे.
--------------------------------------
रस्ते दुरुस्ती संथगतीने
खारघरमधील रस्त्यावरील सर्कल, चौकात रस्त्याचे काँक्रीटीकरण सुरू आहे. पावसाळ्यात वाहतुकीस अडचण होणार नाही, याकडे लक्ष देणे आवश्यक असताना पालिकेकडून तवा हॉटेल समोरील सर्कलमध्ये काँक्रीटीकरणासाठी खोदकाम केले जात आहे. शिवमंदिराकडून खारघर गाव, चेरोबा मंदिर चौक तसेच बँक ऑफ इंडिया सर्कलवरील हाच प्रकार सुरू आहे.
-------------------------------------
कोंडीची ठिकाणे
- तळोजा वसाहतीमधून खारघर वसाहत
- तळोजा, खारघरमधील शीघ्रकृती समोरील रस्ता.
- खारघरकडे, तळोजाकडे जाणारा मार्ग.
------------------------------------
खारघर शहरातील रस्त्यांची दुरवस्था झाली आहे. पालिकेने गणेशोत्सवापूर्वी रस्ते दुरुस्ती करावी, असे पत्र देण्यात आले आहे. दुरुस्ती झाली नाही, तर मनसेच्या वतीने आंदोलन केले जाईल.
- सुरेश पाटील, प्रभाग अध्यक्ष, खारघर
---------------------------------
रस्त्यावर पडलेल्या खड्ड्यांच्या दुरुस्तीचे काम पालिकेकडून सुरू आहे. गणेशोत्सवापूर्वी रस्ते दुरुस्त केले जातील.
- संजय कटेकर, मुख्य अभियंता, पनवेल महापालिका