वाडा, ता. १२ (बातमीदार) : काम केलेल्या मानधनातून १० हजार रुपयांची लाच देण्याची मागणी ‘उमेद’च्या कार्यकर्तीने केली होती. हे पैसे घेताना साेमवारी (ता. ११) कार्यकर्तीला रंगेहाथ पकडून अटक करण्यात आली.

अधिकृत सूत्रांनी दिलेल्या माहितीनुसार, सरकारच्या राज्य ग्रामीण जीवनोन्नती अभियानअंतर्गत उमेद योजनेत समुदाय व्यक्ती म्हणून मानधनावर काम करीत असलेल्या तक्रारदाराने केलेल्या कामाचे मानधन वाड्यातील उमेद कार्यालय येथून निघते. तक्रारदाराला १९ हजार ८०० रुपयांचा मानधन धनादेश मिळालेला असून, त्यामधून उमेद कार्यालयातील महिला लोकसेवक रेणुका रणवीर आत्राम (वय ३०) या लाचेची मागणी करीत असल्याबाबत लाचलुचपत प्रतिबंधक विभागाच्या पालघर शाखेमध्ये तक्रार दाखल केली होती. त्या अनुषंगाने सोमवारी केलेल्या कायदेशीर पडताळणीदरम्यान लोकसेवकाने तक्रारदाराकडे मानधनाचा धनादेश काढून दिल्याबद्दल मोबदला म्हणून १० हजार रकमेची लाच मागणी करून ती घेतल्याने रेणुका आत्राम यांना रंगेहाथ पकडून ताब्यात घेण्यात आले. याप्रकरणी वाडा पोलिस ठाण्यात गुन्हा दाखल करण्यात आला आहे.