भाईंदर , ता. १३ (बातमीदार) : शाळेच्या विद्यार्थ्यांना घेऊन जाणाऱ्या व्हॅनचालकाला वाहतूक पोलिस कर्मचाऱ्याकडून मारहाण करण्यात आल्याचा प्रकार मंगळवारी (ता. १२) काशी मिरा भागात घडला. सिग्नल ओलांडल्याने ही मारहाण करण्यात आल्याचा आरोप चालकाने केला आहे. मारहाण करणाऱ्या पोलिस कर्मचाऱ्यावर कारवाई करण्याची मागणी करण्यात आली आहे.

अनिल तारकले हे आपल्या मालकीच्या व्हॅनने शाळेतील विद्यार्थ्यांना सोडण्याचे काम करतात. मंगळवारी दुपारी १२ वाजण्याच्या सुमारास ते विद्यार्थ्यांना काशी मिरा येथील शाळेत सोडायला जात होते. दहिसर चेकनाकाजवळील पेणकरपाडा सिग्नलजवळ त्यांची व्हॅन थांबली होती. या वेळी मागच्या वाहनचालकाने त्यांना व्हॅन पुढे घ्यायला सांगितली. त्यामुळे त्यांनी ती थोडी पुढे घेतली. या वेळी सिग्नलची रेषा ओलांडली गेली. त्यामुळे त्या ठिकाणी असलेल्या वाहतूक पोलिस कर्मचाऱ्याने अनिल यांना अपशब्द वापरले. याबद्दल अनिल यांनी विचारणा केली असता त्याने त्यांना खाली उतरवून चौकीत नेले व त्यांना मारहाण केली, असा आरोप अनिल तारकले यांनी केला आहे. या वेळी व्हॅनमधील विद्यार्थी घाबरले. याची माहिती मिळताच मनसेचे शहर अध्यक्ष संदीप राणे यांनी कार्यकर्त्यांसह वाहतूक विभागाच्या कार्यालयात धरणे आंदोलन सुरू केले. पोलिस कर्मचाऱ्यावर कारवाई केल्याशिवाय आंदोलन मागे न घेण्याचा इशारा राणे यांनी दिला. अखेर वरिष्ठ अधिकाऱ्यांनी संबंधित कर्मचाऱ्यावर कारवाई करण्याचे आश्वासन दिल्यानंतर आंदोलन मागे घेण्यात आले.