चार वर्षांच्या मुलीच्या हत्येप्रकरणी चुलत मावशीला अटक
कल्याण, ता. १३ (वार्ताहर) : कोळसेवाडी पोलिसांनी आठ महिन्यांच्या कठीण तपासानंतर चार वर्षांच्या अनन्या घाडगेच्या अपहरण व हत्येचा उलगडा केला आहे. याप्रकरणी रायगडमधील भिवपुरी भागातील जोडप्याला अटक करण्यात आली आहे. पोलिसांनी दिलेल्या माहितीनुसार, आरोपी अपर्णा कांबारी ही मुलीची चुलत मावशी असून, तिचा पती प्रथमेश कांबारी आहे. अनन्याचे वडील चोरीच्या प्रकरणात तुरुंगात आहेत, तर तिच्या आईने दुसरे लग्न केल्यामुळे मुलीची काळजी घेण्यासाठी ती आरोपींकडे ठेवण्यात आली होती.

कोळसेवाडी पोलिस ठाण्यात तक्रारदार ज्योती सातपुते यांनी १३ ऑगस्ट २०२४ रोजी त्यांच्या चार वर्षांच्या भाचीचे अपहरण झाल्याची तक्रार नोंदवली होती. त्यानंतर पोलिस तपास सुरू करण्यात आला होता. कल्याणचे पोलिस उपायुक्त अतुल झेंडे यांनी सांगितले की, पोलिसांच्या सातत्यपूर्ण प्रयत्नांनंतरही आरोपी मागील आठ महिन्यांपासून वेगवेगळ्या ठिकाणी लपून फिरत होता. पोलिस तपासादरम्यान वरिष्ठ पोलिस निरीक्षक हेमंत गुरव यांच्या नेतृत्वाखालील पथकाला विश्वासार्ह माहिती मिळाली की, आरोपी जोडपे त्यांच्या मूळ गावी परतत आहे. पोलिसांनी तातडीने कारवाई करत सोमवारी (ता. ११) दोन्ही आरोपींना अटक करण्यात आली.

सहाय्यक पोलिस आयुक्त कल्याणजी घेटे म्हणाले की, आरोपींच्या देखरेखीखाली असलेली मुलगी वारंवार गैरवर्तन करत होती; मात्र दिलेल्या इशाऱ्यानंतरही ती सुधारत नव्हती. त्यामुळे आरोपी प्रथमेश यांनी तिच्यावर हल्ला करून तिचा खून केला. मृतदेहाचा पुरावा नष्ट करण्यासाठी या जोडप्याने मुलीचा मृतदेह पोत्यात भरून गादीमध्ये गुंडाळून नेरळ येथील चिंचवली गावाजवळील एका निर्जन ठिकाणी फेकून दिला होता. मंगळवारी पोलिसांनी मृतदेहाची कवटी जप्त केली असून, त्याची वैद्यकीय तपासणी केली जाणार आहे.