ठाणे जिल्ह्यात मिठाईंच्या दुकानांवर धाडी
कच्चा माल, नमुन्यांची तपासणी
ठाणे शहर, ता. १३ (बातमीदार) : नारळी पौर्णिपासून सुरू झालेल्या सणांच्या काळात अन्न व औषध प्रशासन विभाग सज्ज झाला असून, ठाणे जिल्ह्यात मिठाईंच्या दुकानांमध्ये धाडी टाकून कच्चा माल आणि मिठाईंचे नमुने ताब्यात घेतले जात आहेत. या नमुन्यांना प्रयोगशाळेत तपासणीसाठी पाठवून पुढील कायदेशीर कारवाई केली जाणार असल्याची माहिती विभागाकडून देण्यात आली आहे.

अन्न व औषध प्रशासन मंत्री नरहरी झिरवाळ यांच्या निर्देशानुसार आयुक्त, सहआयुक्त, सहाय्यक आयुक्त, अन्न सुरक्षा अधिकारी, पोलिस प्रशासन, जिल्हाधिकारी व महापालिका आयुक्तांच्या सहकार्याने मिठाई आणि तत्सम अन्नपदार्थांची तपासणी मोहीम राबविण्यात येत आहे. सणासुदीच्या काळात ग्राहकांना भेसळमुक्त, सकस आणि आरोग्यदायी अन्न मिळावे, यासाठी या मोहीमेअंतर्गत मिठाईच्या दुकानांवर बारकाईने पाहणी केली जात आहे. तपासणी दरम्यान दूध, मावा, तेल, मैदा, तूप यांसारखा कच्चा माल सकस आणि निर्भेळ असल्याचे पाहिले जात आहे. तसेच मिठाई बनविण्यासाठी वापरल्या जाणाऱ्या भांड्यांची स्वच्छता, झाकण, किचनची स्वच्छता तसेच पदार्थ बनविणारे कारागीर निरोगी आणि टापटीप असणे आवश्यक आहे, याचीही खात्री केली जात आहे. ठाणे विभागाकडून राबविल्या जाणाऱ्या या स्तुत्य उपक्रमाबाबत ग्राहक संरक्षण संस्थेचे गजानन पाटील यांनी कौतुक व्यक्त केले आहे.

मिठाई तयार करताना आणि विकताना सर्व संबंधितांनी काळजी घ्यावी, कारण लोकांच्या आरोग्याशी खेळ होण्यास कोणतीही परवानगी दिली जाणार नाही. दोषी आढळल्यास संबंधित दुकानावर कायद्यानुसार कडक कारवाई केली जाईल.
- श्रीकांत करकाळे, सहाय्यक आयुक्त, अन्न व औषध प्रशासन ठाणे