अलिबाग, ता. १३ (वार्ताहर)ः दोन महिन्यांच्या बंदीनंतर मासेमारीचा नव्या हंगामात बोंबील, कोळंबी, मांदेली मोठ्या प्रमाणात येत आहे. त्यामुळे माशांचे दर आवाक्यात आल्याने खवय्यांची झुंबड उडत आहे.
खोल समुद्रात मासेमारीसाठी १ जून ते ३१ जुलै यादरम्यान यांत्रिकी नौकांना बंदी करण्यात आली होती. १ ऑगस्टपासून मासेमारीवरील बंदी संपली असून, पावसानेही विश्रांती घेतली आहे. त्यामुळे समुद्रात मासेमारीला सुरुवात केली आहे. सध्या बोंबील, कोळंबी, मांदेली जातीची मासळी मोठ्या प्रमाणात मिळत असल्याची माहिती मच्छीमार बांधवांनी दिली. रायगड जिल्ह्यातील अलिबाग, वरसोली, मुरूड-जंजिऱ्याच्या किनारा परिसरात मासेमारी करणाऱ्या छोट्या बोटींनी लावलेल्या जाळ्यात मांदेली, कोळंबी, बोंबील असे म्हावरे गावत आहेत. लाल जाळी खास कोळंबीसाठी लावली जाते. या जाळीतून अख्खी कोळंबी सोडवून काढणे ही एक कला आहे.
-----------------------
भाव आवाक्यात
आवक वाढल्याने मासळीचे भाव कमी झाले असून, २०० रुपये वाटा मिळणारे बोंबील १०० रुपये, कोळंबी १०० ते २०० रुपये वाटा, तर मांदेली ५० ते १०० रुपयांना विकत असल्याची माहिती मासळीविक्रेत्या महिलेने दिली.