ठाण्यात रंगणार २३ ऑगस्टला राज्यस्तरीय मंगळागौर
गडकरी रंगायतनमध्ये रंगणार सोहळा

सकाळ वृत्तसेवा

ठाणे, ता. १३ : सध्याच्या धावपळीच्या जीवनशैलीत विरंगुळा व सांस्कृतिक परंपरा जपण्यासाठी मंगळागौर स्पर्धा भरविली जात आहे. त्यानुसार भाजपा ठाणे शहर जिल्हा व विश्वास सामाजिक संस्थेच्या वतीने दरवर्षीप्रमाणे २३ ऑगस्ट रोजी राज्यस्तरीय भव्य मंगळागौर स्पर्धेचे आयोजन करण्यात आले आहे.
मराठी संस्कृतीतून अस्तंगत होत असलेला नवरात्रोत्सवातील भोंडला हा विश्वास सामाजिक संस्थेतर्फे काही वर्षांपूर्वी सुरू करण्यात आला. त्यानंतर संस्थेच्या वतीने सांस्कृतिक, साहित्यिक आणि सामाजिक उपक्रम राबविले जात आहेत.
गेल्या वर्षाप्रमाणेच ठाण्यातील राम गणेश गडकरी रंगायतनमध्ये शनिवारी (ता. २३) सकाळी १० ते सायंकाळी ६ पर्यंत स्पर्धा रंगणार आहे. या स्पर्धेत प्रथम क्रमांकाच्या गटाला ३१ हजार रुपये, स्मृतिचिन्ह व प्रशस्तीपत्र, द्वितीय क्रमांकास २१ हजार रुपये, तृतीय क्रमांकास ११ हजार रुपये, उत्तेजनार्थ पारितोषिक म्हणून पाच हजार रुपये आणि अडीच हजार रुपयांची पाच बक्षिसे उत्तेजनार्थ दिली जाणार आहेत. या स्पर्धेत ठाणे शहर, नवी मुंबई आणि ठाणे जिल्ह्याबरोबरच मुंबई शहर, मुंबई उपनगर, रायगड जिल्ह्यातील मंगळागौर साजरे करणारे संघ सहभागी होत आहेत.
---------------------------
महिला गटांचा सहभाग
खोपोली येथील आई गावदेवी चामुंडा देवी, ऐरोलीतील फुलोरा, श्री गणेश महिला मंडळ, मनस्विनी, कन्यारत्न, अन्नपूर्णा, रुचिरा, संस्कृती, कलादर्पण, कुलस्वामिनी, श्री स्वामी समर्थ, श्रावणसरी, सखी, मैत्रीण, श्रावण क्वीन, माउली, राजमाता जिजाऊ, आदिशक्ती, नक्षत्र, विठूमाउली, नवदुर्गा, यशस्विनी, जय महालक्ष्मी, सखी, नथ नऊवारी आणि बरंच काही, शिवकन्या, नारायणी, नृत्यरेखा आदी गटांचा त्यात समावेश आहे. या स्पर्धेसाठी संजय वाघुले यांचे जनसंपर्क कार्यालय, दादा पाटील वाडी, नौपाडा, ठाणे येथे संपर्क साधावा.