स्मार्ट मीटरविरोधात शेकाप आक्रमक
जुने मीटर बसविण्याची मागणी; अन्यथा उग्र आंदोलनाचा इशारा
रोहा, ता. १४ (बातमीदार) : महावितरणकडून कोणतीही पूर्वसूचना न देता जुन्या व्यवस्थित सुरू असलेल्या मीटरच्या जागी जबरदस्तीने स्मार्ट मीटर बसवले जात आहेत. त्यामुळे रोहा तालुक्यातील वीजग्राहकांत तीव्र संतापाची लाट उसळली आहे. ग्राहकांच्या भावना लक्षात घेता व वीज वितरण कंपनीच्या मनमानी कारभाराला रोखण्यासाठी शेतकरी कामगार पक्षाने (शेकाप) आक्रमक भूमिका घेतली आहे. शेकापचे ज्येष्ठ नेते शंकरराव म्हसकर यांनी यापुढे जर कोणत्याही ग्राहकाच्या घरी जबरदस्तीने स्मार्ट मीटर बसवले, तर शेकाप तडफेने उग्र आंदोलन उभारेल, असा इशारा देण्यात आला आहे.
बुधवारी (ता. १३) रायगड जिल्हा मध्यवर्ती बँकेच्या सभागृहात आयोजित बैठकीत म्हसकर यांच्या अध्यक्षतेखाली ही भूमिका मांडण्यात आली. या वेळी तालुका चिटणीस शिवराम महाबळे, हेमंत ठाकूर, मारुती खांडेकर, संतोष दिवकर आदी उपस्थित होते. शेकापतर्फे दिलेल्या निवेदनात मागणी करण्यात आली की, रोहा शहरात आधीच बसवलेले स्मार्ट मीटर तत्काळ काढावेत व त्याऐवजी जुने इलेक्ट्रॉनिक मीटर पुन्हा बसवावेत. स्मार्ट मीटरमुळे आलेली भरमसाट वीजबिले रद्द करावीत. तसेच, ज्यांच्या घरी स्मार्ट मीटर बसवले आहेत, त्यांची यादी जाहीर करावी आणि या मीटरची जोडणी त्वरित तोडण्यात यावी, अशी मागणी करण्यात आली. या मागण्यांवर कोणतीही कारवाई न झाल्यास आंदोलन छेडण्यात येईल, असा इशाराही या वेळी देण्यात आला, तर कार्यकारी अभियंता प्रदीप दाळू यांनी निवेदन स्वीकारताच सांगितले की, ग्राहकांच्या भावना लक्षात घेत वरिष्ठ अधिकाऱ्यांकडे निवेदन पाठवले जाईल.