मराठी चित्रपटांसाठी समिती
आशीष शेलार यांची चित्रपटसृष्टी विकास व सांस्कृतिक विषयांवर सकारात्मक चर्चा
मुंबई, ता. १४ ः सांस्कृतिक मंत्री आशीष शेलार यांनी राष्ट्रवादी चित्रपट व सांस्कृतिक विभागाच्या शिष्टमंडळासोबत बैठकीत विविध प्रलंबित विषयांवर सकारात्मक चर्चा केली. बैठकीत महाराष्ट्रातील बंद पडत चाललेल्या एक पडदा (सिंगल स्क्रीन) चित्रपटगृहांच्या समस्या, नाट्यगृहांमध्ये नाटकांचे प्रयोग वगळून मराठी चित्रपट दाखविण्याचे धोरण ठरवण्यासाठी समिती स्थापन करण्याचा निर्णय घेण्यात आला.
त्याचबरोबर, विठाबाई नारायणगावकर यांच्या नावाने आर्थिक विकास महामंडळ स्थापन करण्याचा प्रस्ताव तयार करून सादर करण्याचे निर्देश संबंधित विभागाला देण्यात आले. नाशिक येथील २००८ पासून प्रलंबित असलेली १२७ एकर गायरान जमीन मुंडेगाव, तालुका इगतपुरी येथे नाशिक फिल्म सिटीसाठी उपलब्ध करून देण्याबाबत आणि दादासाहेब फाळके स्मारक उभारणी व राष्ट्रीय-आंतरराष्ट्रीय महोत्सवात निवडलेल्या मराठी चित्रपटांना थेट अ-वर्ग मान्यता देण्यासंबंधीही चर्चा झाली. शेलार यांनी हे सर्व विषय पुढील दोन महिन्यांत मार्गी लावण्याचे आणि त्यानंतर पुढील आढावा बैठक घेण्याचे आश्वासन दिले.
बैठकीस फिल्म सिटीच्या स्वाती म्हसे पाटील, दुसरे संचालक विभीषण चौरे, राष्ट्रवादी चित्रपट सांस्कृतिक विभागाचे प्रदेशाध्यक्ष बाबासाहेब पाटील, प्रदेश उपाध्यक्ष नितीन धवणे, सिंगल थिएटर असोसिएशनचे अध्यक्ष नितीन दातार, तमाशा परिषदेचे अध्यक्ष मोहित नारायणगावकर, संभाजी जाधव, मराठी डिस्ट्रीब्यूटर चंद्रकांत विसपुते, दिग्दर्शक शिरीष राणे आदी मान्यवर उपस्थित होते.