अंजुरफाटा–चिंचोटी रस्ता ‘मृत्यूचा सापळा’
खड्ड्यांमुळे प्रवाशांचा जीव धोक्यात

भिवंडी, ता. १४ (वार्ताहर) : अंजुरफाटा-चिंचोटी रस्त्याची चाळण झाली असून, सध्या हा रस्ता अक्षरशः ‘मृत्यूचा सापळा’ बनला आहे. रस्त्यावरील मोठमोठे खड्डे, वाहतूक कोंडी आणि दुरुस्तीच्या अभावामुळे या मार्गावरून प्रवास करणे धोक्याचे ठरत आहे. सार्वजनिक बांधकाम विभाग आणि संबंधित यंत्रणांच्या दुर्लक्षामुळे नागरिकांमध्ये तीव्र संताप पसरला आहे. बीओटी (बिल्ड ऑपरेट ट्रान्स्फर) तत्त्वावर तयार झालेल्या या रस्त्याची देखभाल सुप्रीम इन्फ्रास्ट्रक्चर कंपनीकडे होती. काही काळ कंपनीकडून टोलवसुली सुरू होती, मात्र रस्त्याची योग्य देखभाल न केल्यामुळे सार्वजनिक बांधकाम विभागाने टोल बंद करण्याचे आदेश दिले. टोल बंद झाल्यानंतर देखभाल-दुरुस्तीची जबाबदारी न कंपनीने घेतली, ना शासनाने. परिणामी, रस्त्यावर खड्ड्यांचे साम्राज्य निर्माण झाले आहे.

अंजुरफाटा येथील ७२ गाळा ते कालवार आणि खारबावच्या पुढे रस्त्याची स्थिती अत्यंत भयावह आहे. खड्ड्यांमुळे दुचाकीस्वार, वाहनचालक आणि प्रवासी जीव मुठीत घेऊन प्रवास करत आहेत. पावसाळ्यात खड्डे पाण्याने भरून जात असल्याने अपघात होण्याचा धोका अधिकच वाढला आहे. ठाणे–घोडबंदर मार्गावर सुरू असलेल्या दुरुस्ती कामांमुळे अनेक अवजड वाहने पर्यायी मार्ग म्हणून अंजुरफाटा–चिंचोटी रस्त्याचा वापर करत आहेत. यामुळे रस्त्याची स्थिती आणखी बिकट झाली असून, वाहतूक कोंडी नित्याची बाब झाली आहे. रोजंदारीवर नोकरीसाठी प्रवास करणारे, रुग्णवाहिकांतील रुग्ण, विद्यार्थी आणि व्यापाऱ्यांना या दुरवस्थेचा मोठा फटका बसतो आहे. स्थानिक नागरिकांनी प्रशासनाकडून तत्काळ सडकेची सुधारणा करण्याची मागणी केली आहे.

न्यायालयीन प्रक्रियेचा अडथळा
चिंचोटी–अंजुरफाटा ते मानकोली आणि भिवंडी–वाडा हे दोन्ही रस्ते सध्या न्यायालयीन प्रक्रियेत आहेत. त्यामुळे सार्वजनिक बांधकाम विभागाकडून कोणतीही थेट दुरुस्ती करता येत नसल्याचे स्पष्ट करत भिवंडीचे उपअभियंता दत्तू गीते यांनी प्रशासनाच्या अडचणी मांडल्या.