नेरूळमधील पदपथावरील झाकणांची दुरवस्था
अपघाताचा धोका कायम; स्‍थानिकांकडून दुरुस्‍तीची मागणी
जुईनगर, ता. १४ (बातमीदार) : नेरूळ सेक्टर १२ येथील पदपथावरील झाकणांची अत्यंत खराब अवस्था झाल्यामुळे स्थानिक नागरिक, विद्यार्थी आणि ज्येष्ठ नागरिकांमध्ये नाराजीचा सूर वाढला आहे. या परिसरात एनआरबी स्पोर्ट अकॅडमी, शिक्षण प्रसारक विद्यालय, गावदेवी मंदिर ज्येष्ठ नागरिक केंद्र यांसारखी महत्त्वाची ठिकाणे असल्याने रोज अनेक विद्यार्थी, पालक, क्रीडाप्रेमी आणि ज्येष्ठ नागरिकांची वर्दळ असते, मात्र पदपथावरील झाकणं तुटून खड्डे पडल्याने आणि काही झाकणे अर्धवट गटारात गेल्याने पादचारींच्या सुरक्षेचा गंभीर प्रश्न निर्माण झाला आहे.
नागरिकांच्या म्हणण्यानुसार, या तुटलेल्या झाकणांवर केवळ लाकडी प्लाय व तुटलेल्या फरशीचे तुकडे ठेवून धोका टाळण्याचा प्रयत्न करण्यात आला असला तरीही अपघाताची शक्यता कायम आहे. विशेषतः सकाळ-संध्याकाळच्या गर्दीच्या वेळी किंवा पावसाळ्यात पाण्याने खड्डे झाकले जातात, तेव्हा धोका अधिक वाढतो. पालिकेने नुकतीच सेक्टर १६ए मधील पदपथावरील झाकणांची अदलाबदल केली असताना, सेक्टर १२ मधील ही दुरवस्था का लक्षात घेतली जात नाही, असा सवाल नागरिक करत आहेत. या ठिकाणी ये-जा करणाऱ्या विद्यार्थ्यांना अपघाताचा धोका वाढला आहे. ज्येष्ठ नागरिक शंकर शेवाळे यांनी चिंता व्यक्त करताना सांगितले, आम्ही सकाळी चालण्यासाठी जाताना या तुटलेल्या झाकणांमुळे नेहमी भयभीत होतो. आमच्यातील अनेकांना काठीशिवाय चालता येत नाही. अशा वेळी झाकणावर पाय ठेवताना दहा वेळा विचार करावा लागतो. ही स्थिती बदलण्यासाठी पालिकेने त्वरित पावले उचलावीत.