कसारा बोगद्यात मेमूची ट्रायल होणार

शहापूर, ता. १५ (वार्ताहर) ः मुंबईहून नाशिकपर्यंत लोकल चालविण्याचा प्रकल्प रखडल्याने प्रवाशांमधून ओरड सुरू झाल्याने आता तातडीने शहापूर तालुक्यातील कसारा घाटात मेमूची चाचणी येत्या आठवड्यात घेण्यात येणार असल्याचे सूत्रांकडून समजले.
मिळालेल्या माहितीनुसार, विभागीय रेल्वे व्यवस्थापकांनी सहाय्यक विभागीय रेल्वे व्यवस्थापकांना लोकलची पुढील आठवड्यात कसारा बोगद्यात तातडीने चाचणी घेऊन त्याचा अहवाल सादर करण्याच्या सूचना दिल्या आहेत. मेमू लोकल ट्रेनची लांबी- रुंदी- उंची ही वंदे भारत ट्रेनप्रमाणेच असून मेमू लोकल ट्रेन ही १९ डब्यांची मंजूर करण्यात आली आहे. या लोकल ट्रेनमध्येदेखील सहा मोटर कोच आहेत. या ट्रेनचा एकूण एचपी हा ५४०० असून मेमू लोकल ट्रेनचे टेअर वेट हे केवळ ५०० टन आहे. तसेच घाटामध्ये ती योग्य वेगाने पुढे ढकलली जाण्यासाठी वजनाच्या दुप्पट क्षमता म्हणजे अश्वशक्ती लागते. मेमूची ही क्षमता आणि उपलब्धता ही घाटात आवश्यक असलेल्या एचपी क्षमतेच्या चौपट उपलब्ध आहे. तरीही या चाचण्या घेण्याकडे दुर्लक्ष का करण्यात आले, अशी विचारणा मंडल प्रबंधकांनी केली असून आता या चाचण्या तातडीने घेऊन त्याचा अहवाल सादर करण्याच्या सूचना सर्व संबंधित विभागांना व रेल्वेच्या अधिकाऱ्यांना देण्यात आल्या आहेत.