ऑनलाइन कंपन्याविरोधात चालकांचे आंदोलन
प्रादेशिक परिवहन कार्यालयाबाहेर प्रतीकात्मक झेंडावंदन
कल्याण, ता. १६ (वार्ताहर) : ऑनलाइन प्रवासी सेवा देणाऱ्या कंपन्याकडून वारेमाप कमिशन उकळत चालकांची मुस्कटदाबी केली जात आहे. याविरोधात भारतीय गिग कामगार मंच आणि ठाकरे गटाच्या वाहतूक सेनेच्या वतीने कल्याण प्रादेशिक परिवहन कार्यालयासमोर प्रतीकात्मक झेंडावंदन करण्यात आले. आपल्या हक्कासाठी यापुढेदेखील आंदोलन छेडण्याचा इशारा मंचचे अध्यक्ष डॉ. केशव क्षीरसागर यांनी दिला.
मागील काही वर्षांपासून मुंबई शहर आणि उपनगरात ऑनलाइन कंपन्याकडून रिक्षा आणि टॅक्सीद्वारे ऑनलाइन प्रवासी सेवा उपलब्ध करून दिली जात आहे. खासगी रिक्षा-टॅक्सीचालकांकडून प्रवाशाची लूट सुरू असताना ही सेवा तुलनेने स्वस्त असल्याने प्रवाशांकडून या सेवेला प्राधान्य दिले जाते. प्रादेशिक परिवहनकडून रिक्षा-टॅक्सीसाठी प्रवासी भाडे निश्चित करण्यात आलेले असतानाही या कंपन्यांकडून चालकांना तुटपुंजा मोबदला दिला जात आहे. यामुळे चालक हवालदिल झाले आहेत. हे आंदोलन करीत असताना कंपन्यांनी न्यायालयाकडून त्यांच्या आंदोलनासाठी स्थगिती आदेश मिळवला आहे. यामुळे चालकांना आपल्या हक्कासाठी लढादेखील देता येत नसल्याने आता चालकांच्या वतीने संघटना आक्रमक झाली आहे.

स्वातंत्र्यदिनी चालकाच्या स्वातंत्र्यावर गदा आणणाऱ्या कंपन्याविरोधात संघटनेचे अध्यक्ष डॉ. क्षीरसागर यांच्यासह ठाकरे गटाची वाहतूक सेनेचे अध्यक्ष नीलेश भोर यांनी चालकाबरोबर आरटीओ अधिकाऱ्यांची भेट घेत समस्या मांडण्यात आले.