कल्याण-डोंबिवलीत भटक्या कुत्र्यांचा कहर
चार महिन्यांत आठ हजार ७८९ नागरिकांना चावे; वर्षांला एक कोटी १८ लाख खर्च

कल्याण, ता. १६ (वार्ताहर) : कल्याण डोंबिवली महापालिकेच्या क्षेत्रात भटक्या कुत्र्यांनी उच्छाद मांडला आहे. मागील चार महिन्यांत आठ हजार ७८९ जणांवर कुत्र्यांनी हल्ला करून जखमी केल्याने पालिका क्षेत्रातील मोकाट कुत्र्यांचा प्रश्न ऐरणीवर आला आहे. कल्याण डोंबिवली महापालिका क्षेत्रात एप्रिल ते जुलै या अवघ्या चार महिन्यांत तब्बल आठ हजारांपेक्षाही अधिक लोकांवर कुत्र्यांनी हल्ला केल्याने भटक्या कुत्र्यांचा प्रश्न मिटणार कधी, असा सवाल आता उपस्थित केला जात आहे.
गेल्या काही दिवसांपासून भटक्या कुत्र्यांचे प्रमाण वाढले आहे. त्यातच कुत्रे पकडून त्यांचे निर्बीजीकरण करून पुनश्च सोडले जाते. त्यामुळे ही संख्या दिवसेंदिवस वाढत आहे. भटक्या कुत्र्यांच्या नियंत्रणासाठी पालिकेने एका संस्थेकडे हे काम दिले होते. त्यामध्ये एका कुत्र्यामागे ९८९ रुपये खर्च केला जात आहे. तर वर्षाला साधरण एक कोटी १८ लाख ६८ हजार रुपये खर्च केला जात आहे.
--------------------------------
अहवालानंतर आकडा निश्चित
प्रशासकीय सूत्रांकडून मिळालेल्या माहितीनुसार, केडीएमसी क्षेत्रात ९० हजारांहून अधिक कुत्र्यांची संख्या असून, पशुगणना अहवालाचे काम अद्याप सुरू असून, अहवालाअंती कुत्र्यांची आकडेवारी मिळणार असल्याचे सांगण्यात आले.
---------------------------
भटक्या कुत्र्यांच्या टोळीमुळे बालके, ज्येष्ठ नागरिक, तरुणाईसह सर्वसामान्यदेखील हैराण झाले आहेत. कुत्र्यांना सहजपणे मिळणाऱ्या अन्नामुळे ही संख्या वाढत आहे. प्रशासनाने या भटक्या कुत्र्यांच्या संख्येला आळा घालण्यासाठी आता कृती आराखडा तयार करून आवर घालावा, अशी मागणी करण्यात आली आहे.
------------------------------
रेबीज उपलब्ध
केडीएमसीच्या उप आयुक्तांनी प्रसिद्धिमाध्यमांंना सांगितले, की कुत्र्याने चावा घेतलेल्यांसाठी मनपा रुग्णालयात रेबीज इंजेक्शन उपलब्ध असून, भटक्या कुत्र्यांच्या वाढीचा दर कसा कमी राहील या दृष्टिकोनातून प्रशासन उपाययोजना करीत असते.