पोलादपूरला पुन्हा पावसाचा तडाखा
२४ तासांत १२८ मिमी पावसाची नोंद; नदी, नाल्यांना पूर; जनजीवन विस्कळित

पोलादपूर, ता. १६ (बातमीदार) : गेल्या काही दिवसांत विश्रांती घेत असलेल्या पावसाने पुन्हा एकदा जोरदार हजेरी लावत पोलादपूर तालुक्यातील जनजीवन विस्कळित झाले आहे. गुरुवार (ता. १४) व शुक्रवारच्या (ता. १५) दरम्यान २४ तासांत तब्बल १२८ मिमी पावसाची नोंद झाली असून, तालुक्यातील नद्यांना पूर आला आहे. ढवळी व कामथी नद्यांनी अचानक मुसंडी मारल्यामुळे सावित्री नदीला फुगवटा आला असून, नदीकाठच्या गावांना सतर्कतेचा इशारा देण्यात आला आहे. गेल्या ४८ तासांत १७२ मिमी पाऊस पडला आहे. यामुळे अनेक ठिकाणी पूरस्थिती निर्माण झाली आहे.

श्रीकृष्ण जन्माष्टमी व गोपाळकाला सणाच्या पार्श्वभूमीवर बाजारपेठांमध्ये गर्दी अपेक्षित होती. पावसामुळे खरेदीवर मर्यादा आली असून, कापडे, भाजीपाला व अन्य व्यावसायिकांना याचा फटका बसल्याचे चित्र आहे. आजपर्यंतची एकूण पावसाची सरासरी २,८७७ मिमी इतकी नोंद झाली आहे. गेल्यावर्षी याच दिवसापर्यंत पावसाची सरासरी ३३५० मिमी नोंद झाली. यंदा सरासरीपेक्षा ४७३ मिमीने पाऊस कमी झाला आहे. तथापि, वेधशाळेने पुढील काही दिवसांसाठी रेड अलर्ट जाहीर केला असून, येत्या काळात अतिवृष्टीची शक्यता वर्तविण्यात आली आहे.

तालुक्यात दरवर्षी सरासरी ३,६३६ मिमीपेक्षा जास्त पावसाची नोंद होते. मात्र गेल्या चार-पाच वर्षांत हा आकडा ४,००० ते ५,००० मिमीपर्यंत पोहोचत आहे. त्यामुळे रायगड जिल्ह्यात पोलादपूर हा तिसऱ्या क्रमांकाचा सर्वाधिक पावसाचा तालुका ठरत आहे.

प्रशासन सतर्क
सावित्रीसह इतर नद्या दुथडी भरून वाहत असल्यामुळे नदीकाठच्या गावांना सतर्कतेचा इशारा देण्यात आला आहे. प्रशासनाने आपत्ती व्यवस्थापन पथकांना सज्ज ठेवले आहे.