नवी मुंबई-मंत्रालय महिला विशेष बस सुरू
स्वातंत्र्यदिनानिमित्त एनएमएमटीकडून महिलांना भेट
तुर्भे, ता. १६ (बातमीदार) : नवी मुंबई महापालिका परिवहन उपक्रमाने यंदाच्या स्वातंत्र्यदिनाच्या निमित्ताने महिला प्रवाशांना अनोखी भेट दिली आहे. नवी मुंबई ते मंत्रालय/वर्ल्ड ट्रेड सेंटर (मार्गे अटल सेतू) या मार्गावर स्वातंत्र्यदिनापासून महिला विशेष बस सुरू करण्यात आली आहे. ११६ आणि ११७ या मार्गावर या बस सुरू करण्यात आल्या आहेत. त्‍यामुळे या मार्गावरील महिला प्रवाशांनी या बसमार्गाचे स्वागत केले आहे.
नवी मुंबई महापालिका परिवहन उपक्रमामार्फत नवी मुंबई महापालिका हद्दीत व हद्दीबाहेर २४ सर्वसाधारण व ४६ वातानुकूलित अशा एकूण ७० बसमार्गांवर प्रवासी सेवा देण्यात येत आहे. सध्या परिवहन उपक्रमाच्या बसमध्ये दैनंदिन महिला प्रवाशांची संख्या एक लाख इतकी आहे. महिलांचा वाढता प्रतिसाद पाहता गुरुवार (ता. १४)पासून महिलांसाठी या मार्गावर विशेष बस सुरू करण्यात आली आहे.
नवी मुंबईतून मंत्रालय, वर्ल्ड ट्रेंड सेंटरकडे कामानिमित्त जाणाऱ्या महिलांना या बसचा चांगला फायदा होणार आहे. सुरुवात करताना ५० टक्के महिलांचा प्रतिसाद होता.

मार्ग क्रमांक, ठिकाण आणि वेळ

मार्ग क्रमांक ११६
नेरूळ बस स्थानक ते वर्ल्ड ट्रेड सेंटर - सकाळी ८.०५ वाजता
वर्ल्ड ट्रेड सेंटर ते नेरूळ बस स्थानक - सायंकाळी ६.२५ वाजता

मार्ग क्र. ११७
खारघर सेक्‍टर ३५ ते वर्ल्ड ट्रेड सेंटर सकाळी ८ वाजता
वर्ल्ड ट्रेड सेंटर ते खारघर सेक्‍टर ३५ - सायंकाळी ६.५०