कासा, ता. १६ (बातमीदार) : मुंबई-अहमदाबाद महामार्गावरील मेंढवन गावाशेजारील तीव्र उतरणीवर दुचाकीचा भीषण अपघात होऊन दोन तरुण गंभीर जखमी झाले आहेत. गुरुवारी (ता. १५) सकाळी साडेआठ वाजण्याच्या सुमारास भरधाव वेगात असलेला दुचाकीस्वार दुभाजकावर आदळल्याने हा अपघात घडला. हे ठिकाण ‘ब्लॅक स्पॉट’ म्हणून ओळखले जाते.

वसई येथील सफिक खान (वय ३०) आणि भावेश प्रजापती (२५) हे दुचाकीस्वार मोटरसायकल (क्र. एमएच ०४ सीजे ३७८६)वरून अंबोलीकडे जात असताना चालकाचे नियंत्रण सुटल्याने वाहन थेट दुभाजकावर आदळले. या जोरदार धडकेत दोन्ही युवकांच्या डोके, तसेच हातपायांवर गंभीर मार लागला. चालकाने हेल्मेट परिधान केले होते; मात्र अपघाताची तीव्रता इतकी होती, की धडकेत हेल्मेट दूर फेकले गेले. दोघांना तत्काळ ‘१०८’ रुग्णवाहिकेमार्फत कासा ग्रामीण रुग्णालयात दाखल करण्यात आले आहे. या घटनेची माहिती मिळताच चारोटी महामार्ग पोलिस निरीक्षक अमोल जाधव, पोलिस उपनिरीक्षक पऱ्हाड आणि पोलिसांनी घटनास्थळी धाव घेतली. अपघातग्रस्त वाहन बाजूला करून वाहतूक पूर्ववत करण्यात आली असून पुढील तपास कासा पोलिस करीत आहेत.