तारापूर (बातमीदार) : बोईसर यशवंत सृष्टी परिसरात शुक्रवारी (ता. १५) सकाळी दुचाकीवरून संशयास्पद मांसाची वाहतूक करणाऱ्या आरोपीला पोलिसांनी अटक केली. त्याच्याविरोधात बोईसर पोलिस ठाण्यात गुन्हा नोंद करण्यात आला. बजरंग दलाच्या कार्यकर्त्यांनी दुचाकीतून नेण्यात येणारे गोमांस असल्याचा संशय व्यक्त करीत दावा केला आहे. घटनेची माहिती मिळताच बोईसर पोलिसांनी तत्काळ आरोपीला ताब्यात घेतले; मात्र संबंधित मांस कोणत्या प्रकारचे आहे, याबाबत अद्याप खात्री झालेली नाही. पशुवैद्यकीय अधिकाऱ्यांकडून मांसाच्या नमुन्याची तपासणी करण्यात येणार असल्याचे समजते. याबाबत बोईसर पोलिसांनी सांगितले, की तपासणी अहवाल आल्यानंतर पुढील कारवाई करण्यात येईल.