बदलापूर, ता. १६ (बातमीदार) : शहरातील सामाजिक कार्यकर्ते योगेश येलवे यांनी बदलापूर (पूर्व) येथील स्व. निर्मला देवी चिंतामणी दिघे आश्रमशाळेतील गरजू मुलांना डिजिटल शिक्षणाच्या प्रवाहात आणण्यासाठी लॅपटॉपचे वाटप केले.
अनेक वर्षांपासून आश्रमशाळा विमुक्त जाती व भटक्या जमातींतील विद्यार्थ्यांना शिक्षणाची संधी उपलब्ध करून देत आहे. सध्या शाळेत सुमारे १२० विद्यार्थी शिक्षण घेत आहेत. आज शहरी भागात मोबाईल, लॅपटॉप, इंटरनेट ही साधने सहज उपलब्ध असली, तरी आश्रमशाळेतील मुले अजूनही डिजिटल जगापासून दूर आहेत. ही दरी भरून काढण्याचा संकल्प येलवे यांनी स्वातंत्र्यदिनानिमित्त केला. लॅपटॉप भेटीमागील उद्देश केवळ उपकरणे पुरविण्यापुरता मर्यादित नसून, विद्यार्थ्यांना डिजिटल शिक्षणाशी जोडून त्यांचे भविष्य सक्षम बनवण्यासाठी एक पाऊल पुढे टाकल्याचे त्यांनी सांगितले. उपक्रमामुळे विद्यार्थ्यांमध्ये संगणक साक्षरता, नव्या युगाची ओळख आणि आत्मविश्वास निर्माण होईल, असा विश्वास येलवे यांनी यावेळी व्यक्त केला

शिक्षण हे वाघिणीचे दूध आहे; ते प्यायले की माणूस गुरगुरल्याशिवाय राहत नाही, हे भारतरत्न डॉ. बाबासाहेब आंबेडकर यांचे प्रेरणादायी विचार आहेत. याच तत्त्वज्ञानावर आधारित हा उपक्रम राबवला आहे. यामुळे एक मानसिक समाधान आणि देशाचा नागरिक म्हणून काहीतरी चांगले करण्याची संधी मिळाली, ही भावना समाधान मिळवून देत आहे.
- योगेश येलवे, विशेष कार्यकारी अधिकारी