लहान मुलांच्या हृदयावर मोफत उपचार
३७,५०० हून अधिक शस्त्रक्रिया यशस्‍वी
सकाळ वृत्तसेवा
मुंबई, ता. १८ : खारघर, नवी मुंबई आणि देशातील इतर राज्यांमध्ये असलेल्या श्री सत्य साई संजीवनी रुग्णालयामध्ये बिलिंग काउंटरच नाही. या रुग्णालयात निरागस मुलांच्या हृदयाशी संबंधित प्रत्येक आजारांवर पूर्णपणे मोफत उपचार होतात. आतापर्यंत या रुग्‍णालयात ३७,५०० हून अधिक यशस्‍वी शस्त्रक्रिया केल्‍याचे रुग्‍णालय प्रशासनाने सांगितले.
मुंबई येथील रुग्णालयाची देखभाल करणारे ओंकार जोशी यांनी सांगितले की, २०१२ मध्ये छत्तीसगडमधील रायपूर येथून पहिल्यांदा या रुग्णालयाची सुरुवात झाली. दरवर्षी भारतात सुमारे अडीच ते तीन लाख मुले जन्मजात हृदयविकार या गंभीर आजाराने जन्माला येतात, पण वेळेवर ओळख न होणे, तज्‍ज्ञ डॉक्टरांचा अभाव आणि उपचारांचा अधिक खर्च यामुळे अनेक निरागस मुलांना जीव गमवावा लागतो. ही समस्या लक्षात घेऊन श्री सत्य साई आरोग्य आणि शिक्षण ट्रस्टने हे अभियान सुरू केले. विशेष म्हणजे येथे तपासणी, शस्त्रक्रिया, औषधे, निवास आणि शस्त्रक्रियेनंतरची काळजी यासारख्या सर्व सुविधा पूर्णपणे मोफत आहेत. म्हणजेच, पालक बाळासह रुग्णालयात दाखल झाल्यानंतर उपचारानंतर त्यांना डिस्चार्ज मिळेपर्यंत एक रुपयाही खर्च करावा लागत नाही.
जोशी यांनी सांगितले की, २०१९ मध्ये नवी मुंबईत सुरू झालेल्या रुग्णालयात ४,७०० हून अधिक मुलांची हृदय शस्त्रक्रिया करण्यात आली आहे, तर देशभरातील चार रुग्णालयांमध्ये एकूण ३७,५०० हून अधिक शस्त्रक्रिया करण्यात आल्या आहेत.

डॉक्‍टर, परिचारिकांना प्रशिक्षण
हे रुग्णालय केवळ उपचारच देत नाही, तर डॉक्टर, परिचारिका आणि तंत्रज्ञांना प्रशिक्षण देण्यासाठी, कौशल्य कार्यक्रम, सार्वजनिक आरोग्य शिबिरे आणि गर्भवती मातांसाठी काळजी घेण्यासाठी विशेष उपक्रम राबवते. आतापर्यंत १०,००० हून अधिक गर्भवती महिलांची मोफत काळजी घेण्यात आली. १,००० हून अधिक आशा आणि अंगणवाडी सेविकांना प्रशिक्षण देण्यात आले आहे. याशिवाय, संस्थेचे समर्पित संशोधन केंद्र जन्मजात हृदयरोगाच्या कारणांचा शोध घेण्यासाठी अत्याधुनिक तंत्रांचा वापर करून जनुकीय माहितीचे संशोधन करत आहेत.

देणग्‍या आणि सीएसआर निधी
संपूर्ण व्यवस्था निधी, देणग्या आणि सीएसआर निधीद्वारे चालवली जाते, ज्यामध्ये ६० ते ७० मोठे कॉर्पोरेट्स आणि भारत आणि परदेशातील अनेक संस्था जोडलेल्या आहेत. ट्रस्टचे तीन विश्वस्त श्रीनिवास, सुनील गावस्कर आणि विवेक गौर हे केवळ मोफत काम करत नाहीत, तर या मोहिमेत त्यांचा वैयक्तिक आर्थिक हातभार लावतात.