पोशीर-शिलार धरणांच्या निविदांवर शेतकऱ्यांचा संताप
पर्यावरण सुनावणी व जमिनीचे संपादन न करताच कारवाई; संघर्ष पेटण्याची शक्यता
कर्जत, ता. १८ (बातमीदार) ः कर्जत तालुक्यातील पोश्री नदीवरील बोरगाव येथील प्रस्तावित पोशीर धरण आणि चिल्लार नदीवरील शिलार धरण या दोन मोठ्या प्रकल्पांसाठी शासनाने नुकत्याच निविदा जाहीर केल्या, मात्र या निविदा जाहीर होताच शेतकरीवर्गामध्ये तीव्र नाराजी पसरली असून, संघर्ष पेटण्याची चिन्हे आहेत.
गेल्या तीन दशकांपासून पोशीर धरणाविरोधात स्थानिक शेतकरी व ग्रामस्थ सातत्याने आंदोलन करत आहेत. या धरणामुळे बोरगाव, चई, चेवणे, उंबरखांड, भोपळेवाडी, पेंढरी आणि बोन्डेशेत या गावांतील शेकडो कुटुंबे विस्थापित होणार आहेत, तर शिलार धरणामुळे पाथरज ग्रामपंचायत हद्दीतील शिलार, धोत्रे व धोत्रेवाडी गावांवर थेट परिणाम होणार आहे. नवी मुंबई व ठाणे जिल्ह्यांना पाणीपुरवठा करण्यासाठी हे प्रकल्प हाती घेतले जात असल्याचे शासनाचे म्हणणे आहे. यासाठी पोशीर धरणासाठी ६, ३९४ कोटी व शिलार धरणासाठी ४, ८६९ कोटी रुपयांचे अंदाजपत्रक मंजूर करण्यात आले आहे. कोकण पाटबंधारे महामंडळाने स्वतंत्रपणे पोशीर धरणासाठी २,१३५ कोटी व शिलार धरणासाठी १, ६६७ कोटींच्या निविदा काढल्या आहेत, परंतु या प्रकल्पांची पर्यावरण व हवामान बदल सुनावणी अद्याप झाली नसल्याचे शेतकऱ्यांचे म्‍हणणे आहे, शिवाय जमिनीचे संपादन प्रक्रियाही सुरू झालेली नाही. तरीही शासनाने घाईघाईने निविदा काढल्याने संताप उसळला आहे.
...............
पोशीर धरण विरोधी संघर्ष समितीचे सचिव सतीश पाटील यांनी स्पष्ट इशारा देत म्हटले की, या धरणाला ग्रामस्‍थांचा सातत्याने विरोध आहे. आम्ही वारंवार शासनाला निवेदने दिली, मात्र दखल घेतली गेली नाही. आम्ही न्यायासाठी नेहमी सनदशीर मार्ग स्वीकारला असून, आता पुन्हा रायगड जिल्हाधिकाऱ्यांना निवेदन देणार आहोत अन्यथा आम्हाला मोठ्या आंदोलनाचा मार्ग स्वीकारावा लागेल. दरम्यान, या दोन्ही धरणांमुळे शेतजमिनी, घरे, शाळा, मंदिरे आणि सांस्कृतिक वारसा नष्ट होण्याचा धोका असल्याने ग्रामस्थांमध्ये भीतीचे वातावरण आहे. शासनाने स्थानिकांना विश्वासात न घेता केलेली ही कार्यवाही भविष्यात मोठ्या संघर्षाचे कारण ठरू शकते, अशी चर्चा तालुक्यात सुरू आहे.