रोह्यातील ८० जखमी गोविंदांवर मोफत उपचार
रोहा, ता. १८ (बातमीदार) ः रोहे शहार व ग्रामीण भागात यंदाही गोकुळाष्टमी उत्सव मोठ्या उत्साहात आणि पारंपरिक पद्धतीने साजरा करण्यात आला. दरम्यान, शनिवारी गोकुळाष्टमी उत्सव साजरा करीत असताना, ८० गोविंदा जखमी झाले. या जखमी गोविंदांवर डॉ. अपूर्व भट यांच्या भट नर्सिंग होममध्ये मोफत उपचार करण्यात आले.
गोकुळाष्टमी दिवशी सायंकाळी जखमी गोविंदा यांनी डॉ. अपूर्व भट यांच्या भट नर्सिंग होमकडे धाव घेण्यास सुरुवात केली. सात ते आठ मानवी मनोरे रचण्याचा प्रयत्न करीत असताना, काही गावांतील गोविंदा पथक कोसळले. यात अनेक तरुण जखमी झाले. ८० जखमी गोविंदांना प्राथमिक उपचारासाठी भट रुग्णालयामध्ये त्यांच्या सहकाऱ्यांनी दाखल केले. जखमी तरुण, त्यांचे सहकारी व नातेवाइकांनी दवाखान्याबाहेर गर्दी केली होती. जखमी गोविंदांची प्रथम तपासणी करून प्राथमिक उपचार करण्यात आले. किरकोळ जखमा झालेल्या गोविंदांना गोळ्या देण्यात आल्या. उत्सवापूर्वी डॉ. भट रुग्णालयाच्या टीमने गोविंदा पथकांना काही सूचना दिल्या होत्या. त्या सूचनांची तंतोतंत अंमलबजावणी केल्यामुळे यावर्षी एकाही गोविंदाला मोठी इजा झाली नाही. विशेष म्हणजे यावर्षी एकाही गोविंदाचे हात किंवा पाय फॅक्चर झाले नाहीत. कोणावरही ऑपरेशन करण्याची वेळ आली नाही. यादरम्यान ४० जखमी गोविंदांचे एक्स-रेदेखील काढण्यात आले होते. डॉ. अपूर्व भट, डॉ. अभिषेक रापते, डॉ. अभिजीत जोशी, डॉ. तुषार राजपूत व रुग्णालय स्टाफ यांनी जखमी गोविंदांवर रात्री उशिरापर्यंत औषधोपचार केले.