वीज कंपनी सेवकांच्या सहकारी पतसंस्थेची सर्वसाधारण सभा
कल्याण, ता. १८ (वार्ताहर) : महाराष्ट्र स्टेट इलेक्ट्रिसिटी वर्कर्स फेडरेशनच्या अधिपत्याखाली असलेली वीज कंपनी सेवकांची सहकारी पतसंस्था मर्यादित जिल्हा ठाणे कल्याणची सर्वसाधारण सभा रविवारी (ता. १७) कल्याण पतसंस्था अध्यक्ष कॉम्रेड अशोक बामगुडे यांच्या अध्यक्षतेखाली झाली. या सभेला संघटनेचे पदाधिकारी व पतसंस्थेचे सदस्य कृष्णा भोयर सरचिटणीस, अरुण मस्के उपसरचिटणीस, औदुंबर कोकरे, दत्तात्रय कांबळे संयुक्त सचिव, भारती भोयर अध्यक्ष, मंजू वर्मा सचिव महिला आघाडी, जी. आर. पाटील विश्वस्त कल्याणी ट्रस्ट, संतोष चचाणे, दिलीप पाटील झोनल सचिव, सुरेश पवार झोनल अध्यक्ष, अविनाश व रेवती धादवड प्रमुख पाहुणे म्हणून उपस्थित होते.

बाळकृष्ण महाले पतसंस्था सचिव यांनी अहवाल सादर करताना स्पष्ट केले की, सभासदांसाठी ऋणमुक्ती योजना गेल्या ३२ वर्षांपासून राबविण्यात येत आहे. सभासदाचा नैसर्गिक मृत्यू झाल्यास तीन लाख, अपघात व मृत्यू झाल्यास सहा लाख कर्ज माफ करण्यात येते. धर्मादाय व सामाजिक बांधिलकी निधी ५६ लाख १४ हजार आहे. २०२४-२५ या आर्थिक वर्षात संस्थेचा एकूण नफा तीन कोटी १५ लाख ७७ हजार ७५५ झालेला आहे. सभासदांना नऊ टक्के लाभांश जाहीर केला. पतसंस्थेच्या सर्वसाधारण सभेत अनेक सभासदांनी महत्त्वाचे प्रश्न विचारले व अनेक सूचना पतसंस्थेच्या कामकाजाबाबत केल्या. त्याबद्दल संचालक मंडळाने विचार करून निर्णय घेऊ, असा निर्णय दिला. या वेळी मृत कामगारांच्या वारस मनीषा शेलार व शेन सुब्रमणी यांना १५ हजारांचा कल्याण निधीचा धनादेश मान्यवरांच्या हस्ते देण्यात आला.