पनवेल महानगरपालिकेतर्फे ज्येष्ठ नागरिक व कृतज्ञता संवाददिनाचे आयोजन
पनवेल, ता. १८ (बातमीदार) ः पालिकेमार्फत ज्येष्ठ नागरिक आणि कृतज्ञता संवाददिन गुरुवारी (ता. २१) साजरा करण्यात येणार आहे. आयुक्त मंगेश चितळे यांच्या मार्गदर्शनाखाली आद्य क्रांतिवीर वासुदेव बळवंत फडके नाट्यगृह येथे हा विशेष कार्यक्रम आयोजित केला आहे.
कार्यक्रमाची सुरुवात ज्येष्ठ नागरिकांची नोंदणी आणि प्राथमिक आरोग्य तपासणी शिबिराने होईल. त्यानंतर २१ ऑगस्ट हा अल्झायमरदिन असल्याने तज्ज्ञ डॉक्टर्स यांचे अल्झायमरविषयक मार्गदर्शनपर व्याख्यान होणार आहे. ज्येष्ठांना आवश्यक असलेल्या कायदेविषयक सल्ला, राज्य व केंद्र शासनाच्या विविध योजनांची माहिती यावर विशेष व्याख्यान आयोजित करण्यात आले आहे. अलीकडच्या काळात ज्येष्ठ नागरिकांवर वाढणाऱ्या सायबर गुन्ह्यांच्या धोक्याच्या पार्श्वभूमीवर, पोलिस विभागातील वरिष्ठ अधिकारी सायबर फसवणुकीपासून बचावासाठी मार्गदर्शन व प्रश्नोत्तर सत्र घेणार आहेत. ज्येष्ठ नागरिकदिनाचे औचित्य साधून दोन महिला व दोन पुरुष ज्येष्ठ नागरिकांचा सत्कार करून त्यांचा गौरव केला जाणार आहे.
पनवेल महानगरपालिका हद्दीतील सर्व ज्येष्ठ नागरिकांनी या कार्यक्रमास आवर्जून उपस्थित राहावे, तर गुणदर्शन कार्यक्रमात सहभागी होण्यासाठी इच्छुकांनी बुधवार (ता. २०)पर्यंत मोबाईल क्रमांकांवर ७७१५८१५१२७/ ९३२१६७०७६९ नावनोंदणी करावी, असे आवाहन पालिकेतर्फे करण्यात आले आहे.