रबाळे येथे अमली पदार्थ विरोधी जनजागृती मोहीम
नवी मुंबई, ता. १८ (वार्ताहर) : अमली पदार्थांच्या वाढत्या व्यसनाविरुद्ध जनजागृती करण्यासाठी रबाळे पोलिस ठाण्याच्या वतीने शुक्रवार (ता. १५) आणि शनिवारी (ता. १६) विविध शाळा, सार्वजनिक ठिकाणे आणि शासकीय कार्यालयांमध्ये व्यापक पातळीवर जनजागृती मोहीम राबविण्यात आली.
याअंतर्गत सेंट झेवियर स्कूल, मजुद्दीन हायस्कूल, न्यू हॉरिझन, ए. एस. पी. स्कूल, डीएव्ही स्कूल आणि महानगरपालिका शाळा क्रमांक १२० व ४८ येथे व्याख्याने व शिबिरे आयोजित करण्यात आली. या ठिकाणी विद्यार्थ्यांशी थेट संवाद साधून अमली पदार्थांच्या विळख्यात अडकण्याचे दुष्परिणाम, त्यापासून दूर राहण्याचे मार्ग याबाबत मार्गदर्शन करण्यात आले.
विशेष म्हणजे मजुद्दीन हायस्कूलचे शिक्षक, विद्यार्थी व पालकांच्या सहभागातून प्रभातफेरी काढण्यात आली. त्याचबरोबर रबाळे रेल्वेस्थानक परिसरात मानवी साखळीचे आयोजन करून व्यसनमुक्तीचा संदेश देण्यात आला. या ठिकाणी डिजिटल बोर्डच्या माध्यमातूनही जनजागृती संदेश प्रसारित करण्यात आले.
जिजामाता रुग्णालय ऐरोली व सर्व शासकीय कार्यालयांमध्ये अमली पदार्थ विरोधी जनजागृतीचे आयोजन करण्यात आले. नागरिकांपर्यंत थेट संदेश पोहोचावा यासाठी रबाळे रेल्वेस्थानक परिसरात माहितीपर स्टॉल उभारण्यात आले होते. या मोहिमेत स्थानिक नागरिक, विद्यार्थी, शिक्षक, पोलिस कर्मचारी व सामाजिक संस्थांचा उत्स्फूर्त सहभाग दिसून आला.