लाडक्या सुनांना मिळणार ‘बळ’
उपमुख्यमंत्री एकनाथ शिंदे यांची घोषणा
सकाळ वृत्तसेवा
ठाणे, (ता. १८) : मुख्यमंत्री लाडकी बहीण योजना यशस्वी झाल्यानंतर आता घरेलू हिंसाचार मोडीत काढण्यासाठी उपमुख्यमंत्री एकनाथ शिंदे यांनी लाडकी सून योजना ठाण्यात जाहीर केली आहे. ही योजना शासकीय नसून खुद्द शिंदेंचे शिवसैनिक राबवणार आहेत. त्यासाठी हेल्पलाईन नंबर देण्यात आला असून, तक्रार येताच शिवसेना शिंदे गटाचे कार्यकर्ते अत्याचाराचा समाचार घेणार आहेत.
ठाण्याच्या गडकरी रंगायतन येथे रविवारी सायंकाळी शिवसेना शिंदे गट आयोजित मंगळागौर कार्यक्रम पार पडला. या कार्यक्रमाला उपमुख्यमंत्री एकनाथ शिंदे यांनी हजेरी लावली. या वेळी मार्गदर्शन करताना त्यांनी लाडकी सून योजना जाहीर केली. ज्याप्रकारे घरांमध्ये लाडकी मुलगी असते, पण लाडकी सून मात्र नसते, अशा विचारधारेला छेद देऊन प्रत्येक सून ही लाडकीच असली पाहिजे, या उद्देशाने शिवसेनेकडून ही योजना सुरू करण्यात आली आहे.
सुनांनाही सन्मानाने वागवले पाहिजे. अनेक घरांमध्ये सुनांवर अत्याचार होतात, त्यांना त्रास दिला जातो. याला आळा घालण्यासाठी आम्ही ही योजना सुरू केली आहे. ज्या सुनांना मदत हवी असेल त्यांनी न घाबरता या हेल्पलाइनवर संपर्क साधावा, असे आवाहन उपमुख्यमंत्री एकनाथ शिंदेंनी केले. दरम्यान, घरगुती हिंसाचाराचा सामना करणाऱ्या महिलांसाठी एक विशेष हेल्पलाइन नंबर देण्यात आला आहे. ८८२८८६२२८८ असा हा हेल्पलाईन नंबर असणार आहे. लवकरच हा क्रमांक कार्यान्वित होणार असल्याची माहिती देण्यात आली.

चौकट
राज्यभर मोहीम राबवली जाणार
सुरुवातीला समुपदेशनाद्वारे कुटुंबामध्ये समेट घडवण्याचा प्रयत्न केला जाईल. जर ही पद्धत अयशस्वी ठरली, तर मग आपली शिवसेना स्टाईल आहे. ही मोहीम राज्यभर राबवली जाणार असल्याची माहितीही उपमुख्यमंत्री शिंदे यांनी दिली.