सावंतवाडी-दिवा पॅसेंजरमधून दारूची तस्करी
३४ बाटल्या आढळल्या बेवारस गोणीत
सकाळ वृत्तसेवा
ठाणे, ता. १८ : रविवारी सायंकाळी दिवा रेल्वेस्थानकात दाखल झालेल्या अप सावंतवाडी-दिवा पॅसेंजर गाडीतील एका रॅकवर दोन बेवारस गोणींमध्ये एकूण ३४ दारूच्या बाटल्या आढळून आल्या. यावरून या गाड्यांमधून दारूची विक्रीसाठी तस्करी होत असल्याचे बोलले जात आहे. याप्रकरणी ठाणे लोहमार्ग पोलिसांनी अनोळखी इसमाविरोधात महाराष्ट्र दारूबंदी अधिनियम १९४९ कलम ६५ (ई) प्रमाणे गुन्हा दाखल केला आहे.
रेल्वे सुरक्षा बलाचे कमलेश श्रीवास्तव यांनी दिलेल्या तक्रारीत (ता. १७) रविवारी दुपारी तीन वाजल्यापासून रात्री ११ वाजेपर्यंत दिवा रेल्वेस्थानकात कर्तव्यावर होते. फलाट क्रमांक ८वर रात्री साडेआठ वाजता सावंतवाडी-दिवा पॅसेंजर आली असता, ती गाडी चेक करताना कोच नंबर १२७२४२१ ‘सी’मध्ये दोन पांढऱ्या रंगाच्या गोणी बंद आणि बेवारस स्थितीत दिसून आल्या. त्याबाबत डब्यात प्रवाशांना विचारपूस केली असता कोणी पुढे आले नाही. म्हणून एमएसएफच्या मदतीने रेल्वे पोलिस हवालदार पाटील यांच्यासह दोघांनी त्या गोणी उघडल्या. त्या दोन्ही गोणींमध्ये एकूण ३४ दारूच्या बाटल्या आढळून आल्या. एका गोणीत १६ तर दुसऱ्यात १८ बाटल्या होत्या. त्या दारूची एकूण किंमत १२ हजार ५८० रुपये असल्याचे तक्रारीत नमूद करण्यात आले आहे. तसेच अनोळखी व्यक्तीने बेकायदा विक्रीच्या उद्देशाने त्या बाटल्या आणल्याप्रकरणी गुन्हा नोंदविण्यात आला. याप्रकरणी पुढील तपास लोहमार्ग पोलिस ठाण्याचे पोलिस निरीक्षक अर्चना दुसाने यांच्या मार्गदर्शनाखाली सुरू आहे.