वज्रेश्वरी, ता. १८ (बातमीदार) : ठाणे जिल्हा परिषद अंतर्गत भिवंडी पंचायत समितीच्या कृषी विभागामार्फत पात्र शेतकऱ्यांसाठी चार महत्त्वांच्या योजना राबविण्यात येत आहेत. या योजनांमध्ये सुधारित कृषी अवजारे, विविध सिंचन साहित्य, प्लॅस्टिक तंत्रज्ञानाचा वापर (ताडपत्री व मल्चिंग पेपर); तसेच पिक संरक्षणासाठी काटेरी तार कुंपणासाठी अनुदान यांचा समावेश आहे.
भिवंडी तालुक्यातील ग्रामपंचायत क्षेत्रातील शेतकरी व ग्रामीण नागरिकांनी या योजनांचा लाभ घ्यावा, असे आवाहन गटविकास अधिकारी गोविंद खामकर, कृषी विस्तार अधिकारी निता गवळी व मेघा सख्ये यांनी केले. सरकारच्या माध्यमातून मिळणाऱ्या आर्थिक साह्याचा उपयोग करून शाश्वत शेती व उपजीविकेकडे वाटचाल करावी, असेही त्यांनी स्पष्ट केले. या योजनांसाठी अर्ज प्रक्रिया २४ जुलैपासून सुरू झाली असून २० ऑगस्टपर्यंत अर्ज दाखल करता येणार आहेत. अर्जाची तालुका स्तर पडताळणी २१ ते २५ ऑगस्टदरम्यान, तर जिल्हा स्तर पडताळणी २५ ते ३१ ऑगस्टदरम्यान केली जाणार आहे.

२० ऑगस्टपर्यंत ऑनलाइन अर्ज सादर करा
इच्छुक लाभार्थ्यांनी जिल्हा परिषदेच्या अधिकृत संकेतस्थळावर https://zpthaneschemes.com या लिंकवर जाऊन २० ऑगस्टपर्यंत ऑनलाइन अर्ज सादर करावेत, असे आवाहन कृषी विकास अधिकारी बाचोटीकर यांनी केले आहे. अर्ज प्रक्रिया पारदर्शक व सुलभ असून पात्रता निकष, आवश्यक कागदपत्रांची यादी व इतर सर्व तपशील संकेतस्थळावर उपलब्ध आहेत. शेतकऱ्यांनी या योजनांचा लाभ घेऊन शेतीत आधुनिक तंत्रज्ञानाची जोड द्यावी, उत्पादन खर्च कमी करावा आणि शाश्वत उत्पन्नाचा स्त्रोत निर्माण करावा, असे आवाहन भिवंडी पंचायत समितीमार्फत करण्यात आले आहे.