दोशी महिला महाविद्यालयाचा ६६वा वर्धापनदिन उत्साहात
घाटकोपर, ता. १८ (बातमीदार) ः कामा लेन, घाटकोपर पश्‍चिमेतील श्रीमती पी. एन. दोशी महिला महाविद्यालयाचा ६६वा वर्धापन दिन मोठ्या उत्साहात आणि जल्लोषात साजरा करण्यात आला. कार्यक्रमाची सुरुवात भारतीय सेनेचे निवृत्त कर्नल के. जे. सिंग आणि एमएफयूजी कंपनीच्या संचालक स्वाती त्रिपाठी, संस्थेच्या प्रमुख विश्वस्तांच्या हस्ते दीपप्रज्वलन करून झाली. याप्रसंगी महाविद्यालयाच्या प्राचार्या डॉ. आशा मेनन यांना ‘एक्स्ट्रा माइल अवॉर्ड’ हा विशेष पुरस्कार प्रदान करण्यात आला. हा सन्मान त्यांना शिक्षण क्षेत्रातील दीर्घ योगदान आणि प्रभावी नेतृत्वाबद्दल बहाल करण्यात आला. संस्थेच्या व्यवस्थापकीय विश्वस्त मीना खेतनी यांनी संस्थेच्या वाटचालीवर प्रकाश टाकताना सांगितले, की फक्त पाच विद्यार्थिनींनी सुरू झालेला हा प्रवास आज सात हजार विद्यार्थिनींपर्यंत पोहोचला आहे. सरकार ‘बेटी बचाओ, बेटी पढाओ’चा नारा देत असताना आमच्या संस्थेने तो खऱ्या अर्थाने प्रत्यक्षात उतरवला आहे. कार्यक्रमात गुणवंत विद्यार्थिनी, उत्कृष्ट शिक्षक आणि शिक्षकेतर कर्मचाऱ्यांचा गौरव करण्यात आला. सूत्रसंचालन डॉ. मंजू छेडा आणि डॉ. अमृता बेहेल यांनी अत्यंत सुंदररीत्या पार पाडले.