पोयनाड परिसरात दिवसभर रिपरिप
पोयनाड, ता.१८ (बातमीदार): अलिबाग तालुक्यातील पोयनाड परिसरात रविवारी रात्रीपासून पडणाऱ्या पावसाने जनजीवन विस्कळीत झाले. सोमवारी दिवसभर पावसाची संततधार कायम होती. त्यामुळे अनेक ठिकाणी पाणी साचले होते.
पोयनाडच्या आठवडा बाजारामुळे पावसामुळे ग्राहकांची तुरळक गर्दी दिसून आली. पोयनाड नाक्यावर पाणी साचल्याने वाहनचालकांना वाट काढताना कसरत करावी लागली. मुसळधार पावसामुळे रस्त्यावरून वाहणारे पाणी आणि खड्ड्यांचा अंदाज न आल्याने अनेक वाहनचालक गाडीवरून पडल्याच्या घटना घडल्या. रस्त्यावर पाणी साचल्याने पेझारी-पोयनाड दरम्यान वाहतूक संथगतीने सुरू होती. पोयनाड परिसरातील शिवमंदिरांमध्ये भाविकांची गर्दी दिसून आली. श्रीक्षेत्र कनकेश्वर येथे भाविकांनी दर्शनासाठी गर्दी केली होती.