वसई, ता. १८ (बातमीदार) : केवायसी अपडेट करून देतो, असे सांगून एका व्यक्तीची एक लाख ६० हजारांची फसवणूक करण्यात आली होती, मात्र पोलिसांनी तत्काळ दखल घेतल्याने अन्य बँक खात्यात वर्ग केलेली रक्कम थांबविण्यात आली. पोलिस आणि न्यायालयामार्फत पुन्हा तक्रारदाराला ही रक्कम मिळवून देण्यात यश आले आहे.

बँकेचा लोगो असलेल्या अनोळखी क्रमांकावरून व्हॉट्सॲपद्वारे बँकेतून बोलत असल्याचे तक्रारदाराला सांगून तुमचे खाते बंद करण्यात आले आहे. ते चालू ठेवण्याकरिता तक्रारदाराला लिंकवर केवायसी करण्याचे सांगितले. त्यानुसार माहिती भरण्यात आली, मात्र नंतर खात्यातून रक्कम वजा झाल्याचा मेसेज प्राप्त झाला. त्यामुळे ऑनलाइन आर्थिक फसवणूक झाल्याचे लक्षात आले. सायबर पोलिसात याबाबत तक्रार नोंदविण्यात आली. त्यानंतर तक्रारदारांची फसवणुकीची वर्ग झालेली रक्कम संशयित बँक खात्यात थांबविण्यात आली. तक्रारदाराची रक्कम परत मिळविण्याकरिता न्यायालयामध्ये अर्ज सादर केला. सायबर पोलिस ठाण्याने न्यायालयामध्ये अहवाल सादर केला. सायबर पोलिसांनी बँकेसोबत, तसेच न्यायालयाकडे पाठपुरावा करून तक्रारदारांची फसवणूक झालेली एक लाख ६० हजारांची रक्कम मूळ खात्यात परत मिळविण्यात यश आले.