रोहा, ता. १८ (बातमीदार)ः रोहे तालुक्याला मुसळधार पावसाने पार झोडपून काढले आहे. सलग तीन दिवस धुमाकूळ घालणाऱ्या पावसाने साऱ्यांची दाणादाण उडाली आहे. पूर परिस्थितीच्या अनुषंगाने रोहा नगरपालिकेने दवंडी पिठून नागरिकांना सावधान केले आहे.
मुसळधार कोसळणाऱ्या पावसाने जिल्ह्यातील जनजीवन विस्कळीत केले आहे. रोहे शहारासह नागोठणे, कोलाड, सुतारवाडी, धाटाव, चणेरा, भालगाव, घोसाळे तालुक्यातील इत्यादी भागात पावसामुळे जन जीवन विस्कळीत झाले आहे. पावसामुळे शहरातील कुंडलिका, नागोठणे येथील आंबा नदीने सोमवारी सकाळी इशारा पातळी ओलांडली. तर पावसाचा जोर कायम राहिल्याने दुपारनंतर दोन्ही नद्यांनी धोक्याची पातळी ओलांडली होती. कुंडलिका पुलावरू पुराचे पाणी जात असल्यामुळे वाहतूकसाठी पूल बंद करण्यात आला आहे.
--------------------------
ग्रामीण भागाला फटका
दमखाडी, अष्टमी नाका, संजय गांधी हॉस्पिटल परिसर इत्यादी भागातील मुख्य रस्त्यावर, मोठ्या प्रमाणात पाणी शिरल्याने शेतीचे मोठ्या प्रमाणात नुकसान झाले. तररोहे शहर, चणेरा, कोलाड नाकास नागोठणे बाजार पेठेवर गंभीर परिणाम झाला.