राज्यस्तरीय जलतरण स्पर्धेत माणगावच्या ललितची सुवर्ण कामगिरी
माणगाव, ता. १९ (वार्ताहर) ः राज्य क्रीडा प्रबोधिनी बालेवाडी पुणे येथे महाराष्ट्रातील अंडरवॉटर स्पोर्ट्स असोसिएशन यांच्या माध्यमातून पाचवी राज्यस्तरीय फिन्सविमिंग चॅम्पियनशिप रविवारी (ता. १७) पार पडली. या स्पर्धेत माणगावच्या ललित कदम याने बाजी मारली आहे. वय वर्षे ११ या गटातून ललितने एक सुवर्ण, एक रौप्य आणि एक कांस्य पदक मिळवत आपल्या गावाचे नाव उंचावले आहे.
ललित कदम हा जे. एम. राठी विद्यालय येथे शिक्षण घेत असून मुख्य प्रशिक्षक भूषण शिर्के यांच्या उत्कृष्ट मार्गदर्शनाखाली शिकत आहे. ललितच्या कामगिरीची दखल घेत राष्ट्रीय स्पर्धेसाठी त्याची अधिकृत निवड करण्यात आली आहे. सलग दोन वर्षे त्याची राष्ट्रीय स्तरावर निवड झाल्याबद्दल सह्याद्री स्पोर्टस माणगाव, सामाजिक संघटना आणि विविध क्रीडाप्रेमी यांनी ललितचे विशेष कौतुक केले आहे.