रोहा शहरावर पुराचे सावट
कुंडलिका नदीने धोक्याची पातळी ओलांडली
रोहा, ता. १९ (बातमीदार)ः रायगडसह रोहा तालुक्यात सलग चार दिवस पडणाऱ्या मुसळधार पावसाने अक्षरशः झोडपून काढले. मंगळवारी (ता. १९) पहाटेपासून वादळी वाऱ्यासह पडणाऱ्या पावसामुळे कुंडलिका नदीने धोक्याची पातळी ओलांडली आहे. रोहा अष्टमीला जोडणाऱ्या जुन्या पुलावरून पाणी वाहू लागल्याने रोहा नगर परिषद प्रशासनाने नागरिकांना सतर्कतेचा इशारा दिला आहे.
रोहे शहरात ग्रामीण भागातही मुसळधार पावसाने कहर केला. नद्या, ओहोळ, नाल्यांना सलग दुसऱ्या दिवशी पूर आल्याचे चित्र होते. ग्रामीण हद्दीतील कालव्यातून येणाऱ्या पाण्याचा फटका बसला. मुसळधार कोसळणाऱ्या पावसाने रोहे शहराबरोबरच नागोठणे, कोलाड, सुतारवाडी, धाटाव, चणेरा, भालगाव, घोसाळे परिसरातील जनजीवन विस्कळित झाले आहे.