सकाळ वृत्तसेवा
डोंबिवली, ता. १९ : दोन दिवसांपासून कल्याण-डोंबिवली शहरात पावसाची संततधार सुरू आहे. त्यात मंगळवारी (ता. १९) पहाटेपासून पावसाचा जोर वाढल्याने डोंबिवलीतील अनेक सखल भागात पाणी साचले आहे.
डोंबिवली स्थानक परिसर पुन्हा एकदा पाण्याखाली गेला असून, गुडघाभर पाण्यातून नागरिकांना वाट काढत मार्गक्रमण करावे लागत आहे. पूर्वेतील रेल्वेस्थानकाबाहेरील दुकानांमध्ये पाणी शिरल्याने दुकानदारांनी दुकाने बंद करून बाहेर बसण्याचा मार्ग पत्करला. भाजी मार्केट परिसरातही पाणी भरल्याने विक्रेते, ग्राहकांची तारांबळ उडाली. सोमवारपासून (ता. १८) पडणाऱ्या जोरदार पावसामुळे डोंबिवली पूर्वेतील रेल्वेस्थानक परिसर, भाजी मार्केट, नांदिवली मठ परिसर, समर्थनगर, एमआयडीसी निवासी विभाग, डोंबिवली पश्चिमेतील भागशाळा मैदान परिसर, कोपर रेल्वे पूल बोगदा परिसरात पाणी साचले आहे. गुडघाभर पाणी कोपर येथील रेल्वेच्या बोगद्याखाली साचल्याने नागरिकांचा मार्ग बंद झाला. पालिका प्रशासनाने शाळांना सुट्टी जाहीर केल्याने मंगळवारी शाळा भरल्या नाहीत; मात्र काही खासगी शाळा परीक्षा असल्याने सुरू होत्या.डोंबिवली पूर्वेतील राजाजी पथ येथे मोठे झाड रस्त्यावर पडल्याने वाहतूक काही काळ बंद पडली होती. अग्निशमन दलाने त्वरीत घटनास्थळी धाव घेत हे झाड बाजूला करून वाहतूक सुरळीत केली.

खड्ड्यांमुळे रस्त्याची चाळण
डांबरी रस्त्यांची खड्ड्यांमुळे चाळण झाली आहे. या खड्डयांत पाणी साचल्याने वाहतूक व्यवस्थेवर परिणाम झाला. पाण्यामुळे खड्ड्यांच्या अंदाज येत नसल्याने अनेक दुचाकीस्वारांची गाडी त्यात अडकून बंद पडत होत्या.