भिवंडीत केमिकल गोदामाला भीषण आग
भिवंडी, ता. १९ (वार्ताहर) : भिवंडी शहरासह ग्रामीण भागात सोमवारी (ता. १८) रात्रीपासून मुसळधार पाऊस सुरू असताना पूर्णा ग्रामपंचायतीतील मायाश्री कंपाउंड येथील मधुसूदन या केमिकल गोदामास मंगळवारी (ता. १९) सकाळच्या सुमारास भीषण आग लागल्याची घटना घडली. संततधार पावसात या ठिकाणी आगडोंब सुरू होता. यामध्ये अनेक वेळा याठिकाणी स्फोट झाले.
या घटनेची माहिती मिळताच भिवंडी अग्निशामक दलाच्या दोन गाड्या घटनास्थळी दाखल झाल्या; मात्र केमिकल आगीवर नियंत्रण मिळविण्यासाठी लागणाऱ्या फोमचा तुटवडा व पाण्याची कमतरता यामुळे आगीवर नियंत्रण मिळविण्‍यात अडचण निर्माण झाल्या. त्यामुळे मदतीसाठी ठाणे व कल्याण पालिकेच्या अग्निशामक दलांना पाचारण करण्यात आले; मात्र वाहतूक कोंडीमुळे दुपारी एक वाजेपर्यंत या गाड्या घटनास्थळापर्यंत पोहोचू शकल्या नाहीत. या भीषण आगीत सात ते आठ गोदामे जळून खाक झाली असून नजिकची इतर गोदामेसुद्धा जळण्याच्या स्थितीत आलेले आहेत. दरम्यान, या केमिकल गोदामांना लागलेल्या आगीमुळे परिसरातील नागरिकांना डोळे चुरचुरणे व श्वसनाचा त्रास झाला.