काटईत कंटेनरला अपघात
भिवंडी, ता. २० (वार्ताहर) : मागील तीन दिवसांपासून सुरू असलेल्या मुसळधार पावसामुळे अपघातांच्या घटना घडत आहेत. भिवंडी शहरानजीकच्या काटई ग्रामपंचायत हद्दीत तळवली नाका येथील तलावात ब्रेक निकामी झालेला कंटेनर कोसळला आहे. बुधवारी (ता. २०) सकाळी आठ वाजताच्या सुमारास कंटेनर भिवंडी येथून पारोळमार्गे भिवंडी- अहमदाबाद मार्गावर जाण्यास निघाला होता. काटई येथील तळवली नाका येथे उतारावर कंटेनर आला असता कंटेनरचे ब्रेक निकामी झाले. त्यामुळे चालकाने प्रसंगावधान राखत समोरील वाहनांना वाचवण्यासाठी तलावाच्या संरक्षक भिंतीस ठोकर देत थांबवण्याचा प्रयत्न केला; मात्र कंटेनर नियंत्रणात न राहिल्याने कंटेनर थेट तलावात जाऊन पडला आहे. या वेळी चालकाने उडी मारून स्वतःला वाचविले आहे.