कासा, ता. २० (बातमीदार) : कासा ग्रामपंचायत परिसरात गेल्या काही दिवसांपासून सुरू असलेल्या मुसळधार पावसामुळे गावातील अनेक घरांसह दुकानदारांच्या गाळ्यांमध्ये पाणी घुसल्याने लोकांचे मोठे नुकसान झाले आहे. अचानक आलेल्या पाण्यामुळे भीतीचे वातावरण निर्माण झाले होते; मात्र ग्रामस्थांनी दाखवलेल्या प्रसंगावधानामुळे मोठा अनर्थ टळला.

शांताराम घाटाळ, काजल मढवी, सुधीर घाटाळ, कल्पेश भोईर, जयप्रकाश कोदे, दिलीप धात्रक यांची घरे आणि नंदकिशोर परिहार व त्यांच्या चार-पाच शेजारी दुकानदार, तसेच बिरसा मुंडा चौकातील दुकानदारांच्या दुकानांमध्ये पाणी शिरल्याने ठिकठिकाणी साहित्याचे नुकसान झाले. कोणत्याही परवानगीशिवाय होणारी अनियोजित बांधकामे, ग्रामपंचायतीचे नाहरकत दाखले देण्याचे अधिकार काढून घेतल्यामुळे होत असलेले अडथळे, तसेच पाटबंधारे विभागाने पाइपलाइन घालताना मोठ्या पाण्याचा नैसर्गिक प्रवाह असणारा पाट बंद केल्याने ही परिस्थिती उद्भवत असल्याचे निदर्शनास आले, अशी चिंता ग्रामस्थांनी व्यक्त केली.

पावसाचा जोर सुरू असतानाच सरपंच सुनीता कामडी, उपसरपंच हरेश मुकणे आणि ग्रामविकास अधिकारी आर. दिघे यांनी गुडघाभर पाण्यात उभे राहून बाधित भागाची पाहणी केली व नुकसानग्रस्त नागरिकांना धीर दिला. परिस्थिती नियंत्रणात आणण्यासाठी ग्रामपंचायत, तलाठी व मंडळ अधिकारी यांनी त्वरित मदतकार्य सुरू केले.