रविवारी अंधश्रद्धा निर्मूलन समितीचे कार्यकर्ता संस्कार शिबिर
सकाळ वृत्तसेवा
ठाणे, ता. २१ ः महाराष्ट्र अंधश्रद्धा निर्मूलन समिती ठाणे शहर शाखेच्या वतीने रविवारी (ता. २४) एकदिवसीय कार्यकर्ता संस्कार शिबिर ठाण्यातील मो. ह. विद्यालयात सकाळी नऊ ते सायंकाळी सहा वाजेपर्यंत आयोजित करण्यात आले आहे.
अंनिसच्या या कार्यकर्ता संस्कार शिबिराचे उद्घाटन नाॅलेज पार्क फॉर रूरल डेव्हलपमेंट या संस्थेचे सचिव देवेंद्र जोंधळे यांच्या हस्ते होईल. या शिबिरात डाॅ. सुषमा बसवंत या वैज्ञानिक दृष्टिकोन, प्राचार्य मच्छिन्द्रनाथ मुंडे हे मन व मनाचे आजार आणि चमत्कारामागील विज्ञान तर राजेश देवरुखकर हे अंनिसची पंचसूत्री तसेच सुशीला मुंडे या अंनिसची व्यापक वैचारिक भूमिका या विषयांवर मार्गदर्शन करतील, अशी माहिती कार्याध्यक्ष, ज्येष्ठ पत्रकार अनिल ठाणेकर व प्रधान सचिव अशोक मोहिते यांनी दिली आहे.