ठाण्यात आरोग्य कर्मचाऱ्यांचे ‘न्याय दो’ आंदोलन
ठाणे शहर, ता. २२ (बातमीदार) : ठाणे शहरातील विठ्ठल सायन्ना जिल्हा सामान्य रुग्णालयात शुक्रवारी (ता. २२) सुमारे ५०० आरोग्य कर्मचाऱ्यांनी ‘न्याय दो’ आंदोलन केले. राष्ट्रीय आरोग्य अभियानांतर्गत काम करणाऱ्या या कर्मचाऱ्यांनी त्यांच्या विविध मागण्यांकडे शासनाचे लक्ष वेधण्यासाठी रॅली काढली.
गेल्या २० वर्षांपासून सेवा देत असूनही, या कर्मचाऱ्यांना कायमस्वरूपी सरकारी सेवेत सामावून घेण्यात आलेले नाही. त्यामुळे ते अनेक लाभांपासून वंचित आहेत. संसर्गजन्य रोगांची लागण झाल्यास त्यांना उपचारांसाठी विम्याचाही लाभ मिळत नाही. या अन्यायाविरोधात कर्मचाऱ्यांनी राज्यभर आंदोलन सुरू केले आहे.
दरम्‍यान, त्यांच्या मागण्या मान्य न झाल्यास आंदोलन आणखी तीव्र करण्याचा इशारा कर्मचाऱ्यांनी दिला आहे. लवकरच ते मोठ्या प्रमाणात रक्तदान करून शासनाचा निषेध करणार आहेत.